नर्मदा काठावर मगरीचा युवकावर हल्ला निमगव्हाणची घटना : युवकाचा जागीच मृत्यू

लोकमत न्यूज नेटवर्कनंदुरबार : नर्मदा काठावरील अंघोळीसाठी गेलेल्या युवकावर मगरीने हल्ला केल्याने त्याचा जागीच मृत्यू झाल्याची घटना चिंचखेडी/निमगव्हाणपाडा येथे बुधवारी सायंकाळी घडली. गिरधर धन्या तडवी (20) असे मयताचे नाव आहे. याबाबत मिळालेल्या माहितीनुसार, गिरधर तडवी हा युवक बुधवारी सायंकाळी निमगव्हाणनजीक नर्मदा नदीच्या तिरावर अंघोळीसाठी गेला होता. तेथे अचानक त्याच्यावर मगरीने हल्ला केला. त्याची दोन तासानंतर मगरीच्या तावडीतून सुटका करण्यात आली. परंतु तोर्पयत त्याचा मृत्यू झाला होता. या भागातील जिल्हा परिषद सदस्य रतन पाडवी यांनी धडगाव पोलिसांना याबाबत कळविले. पोलिसांनी तातडीने घटनास्थळाकडे धाव घेतली. दरम्यान, सरदार सरोवर प्रकल्पाच्या फुगवटय़ामुळे नर्मदा काठावरील अनेक गावांमध्ये मगरींचे साम्राज्य निर्माण झाले आहे. यामुळे अनेकांना जायबंदी व्हावे लागत असून अनेकांना जीवही गमवावा लागत आहे.