महिनाभराचे रोजे असल्याने मुस्लीम समाजाने लसीकरण फारसे केले नाही, उपाशीपोटी कोरोना लसीकरण घेऊ नये, असा वैद्यकीय सल्ला असल्यामुळे मुस्लीम बांधवांनी रमजान महिना संपल्यानंतर कोरोना लसीकरण घेण्यासाठी पुढे येत आहे. यासाठी नवापूर तहसील कार्यालयात तहसीलदार मंदार कुलकर्णी, पोलीस निरीक्षक बाळासाहेब भापकर यांनी मुस्लीम बांधवांची बैठक घेऊन लसीकरण करण्यासंदर्भात मार्गदर्शन केले. त्यानुसार नवापूर सुन्नी मुस्लीम ट्रस्टीकडून लसीकरण संदर्भात आव्हान करण्यात आले आहे. यांतर्गत रविवारी सकाळी नवापूर शहरातील मदरसा हॉलमध्ये सुन्नी मुस्लीम ट्रस्ट सचिव गुलाम भाई व्होरा यांनी सुरुवातीला लसीकरण केले. त्यानंतर इतरांच्या लसीकरणाला सुरुवात झाली.
यावेळी सुन्नी मुस्लीम ट्रस्ट सचिव गुलाम भाई व्होरा, तहसीलदार मंदार कुलकर्णी,तालुका आरोग्य अधिकारी डॉ. शशिकांत वसावे, पालिका बांधकाम सभापती आरिफभाई बलेसरिया,भाजपाचे अल्पसंख्याक मोर्चाचे प्रदेश उपाध्यक्ष एजाज शेख, अखिल भारतीय अल्पसंख्याक युवा संघटनेचे प्रमुख रऊफ शेख, नगरसेवक आयुब बलेसरिया, जकीर पठाण, पालिकेचे कार्यालयीन अधीक्षक अनिल सोनार आदी उपस्थित होते. प्रभाग क्रमांक तीनमधील राष्ट्रवादीचे नगरसेवक खलील खाटीक, नगरसेविका मीनल लोहार, राष्ट्रवादी जिल्हा उपाध्यक्ष अमृत लोहार यांच्या प्रमुख उपस्थितीमध्ये मदरसा हॉल येथे ४० हिंदू-मुस्लीम बांधवांनी लसीकरण करून घेतले. रमजान नंतर मुस्लीम बांधव लसीकरण घेण्यासाठी केंद्रांवर दिसून येत आहे. कोरोनाची कुठलीही लाट आल्यास लसीकरण एकमेव आपल्याला कोरोना आजारापासून वाचवू शकतो, असे मत वैद्यकीय अधिकारी डॉ. शशिकांत वसावे यांनी व्यक्‍त केले.