कोरोना लसीकरणाबाबत नवापुरात बैठक

या बैठकीला पोलीस निरीक्षक बाळासाहेब भापकर, पालिका मुख्याधिकारी महेश चौधरी, तालुका आरोग्य अधिकारी डॉ. शशिकांत वसावे, डॉ. अविनाश मावची,पोलीस निरीक्षक उपस्थित होते. तहसीलदार कुलकर्णी म्हणाले की, नवापूर तालुका कोरोनामुक्त करायचा आहे. यासाठी सर्वांनी कोरोना लस घेतली पाहिजे. कोरोनापासून बचाव करायचा असेल तर सर्वांनी लसीकरण केले पाहिजे. नवापूर शहर व तालुका कोरोनामुक्त व लसीकरण युक्त करण्यासाठी सर्वांनी साथ द्यावी. डॉ. शशीकांत वसावे व डॉ. अविनाश मावची यांनीही मार्गदर्शन केले. यावेळी ट्रस्टी गुलाब व्होरा म्हणाले की, रविवारपासून गढी भागातील मदरसा हॉल व इदगाह रोडजवळील सामाजिक सभागृह लसीकरण करण्यासाठी उपलब्ध करुन देऊ. कोरोना लसीबाबत जनजागृती करुन जास्तीत जास्त लसीकरण करुन घेण्याचे सर्व ट्रस्टी प्रयत्न करणार आहेत. गुलाम व्होरा यांनी तहसीलदारांना आश्वासित केले की, मशिदीमधून जाहीर आवाहन करुन यात सर्व धर्मगुरु जातीने सहभाग घेऊन लसीकरणाचा कार्यक्रम यशस्वी करुन दाखवू, असे सांगितले. भाजपचे अल्पसंख्याक मोर्चाचे प्रदेश उपाध्यक्ष एजाज शेख यांनी सांगितले की, मुस्लिम समाजाला हज किंवा उमराला जाण्यापूर्वी लसीकरण हे बंधनकारक आहे. त्यामुळे नंदुरबार जिल्ह्यातील सर्व मुस्लिम समाजानेही स्वत:हून पुढाकार घेऊन लसीकरण करुन घ्यावे. कोरोनापासून बचाव करण्यासाठी लसीकरण हे महत्त्वाचे आहे. लसीबाबत असलेले गैरसमज व अफवांपासून दूर राहून आपल्या आरोग्यासाठी लसीकरण चांगला पर्याय आहे. यावेळी जाकीर पठाण, इद्रीस टिनवाला, रमीज शेख, पमा सैयद, मौलाना सिध्दीक, मोलवी रफीक, सोहेल बलेसरिया, मौलाना अनवर आदी उपस्थित होते.