खड्डय़ांनी घेतला फैजपूरच्या दुचाकीस्वाराचा बळी

जळगाव : राष्ट्रीय महामार्गावर शनिवारी दुपारी झालेल्या अपघातात फैजपूर येथील दुचाकीस्वार ठार झाला आहे.

जळगाव : राष्ट्रीय महामार्गावर शनिवारी दुपारी 4.30 च्या सुमारास झालेल्या अपघातात फैजपूर येथील दुचाकीस्वार ठार झाला आहे. मोहंमद अहमद मोहंमद इकबाल (वय 50) असे ठार झालेल्या व्यक्तीचे नाव आहे.

मोहंमद अहमद मोहंमद इकबाल हे शहराकडून भुसावळकडे दुचाकीने जात होते. या दरम्यान गोदावरी अभियांत्रिकी महाविद्यालयानजीक त्यांच्यासमोर असलेली लहान मालवाहतूक गाडी खड्डे चुकविण्यासाठी हळू झाली.

मोहंमद अहमद मोहंमद इकबाल हे भरधाव वेगात होते. समोर असलेल्या मालवाहू वाहनावर आपण धडकणार या भितीने त्यांनी दुचाकीचे ब्रेक दाबले. पण तरीही दुचाकी नियंत्रणात आली नाही.

अशात दुचाकी डगमगून रस्त्याखाली गेली. त्यात मोहंमद अहमद मोहंमद इकबाल यांच्या डोक्याला व हातांना जबर मार लागला. त्यांना जिल्हा रुग्णालयात उपचारासाठी लागलीच दाखल करण्यात आले होते. पण उपचारादरम्यान त्यांचा रविवारी मृत्यू झाला.