अनलाॅकबाबत ग्रामीण भागात उत्सुकता
रांझणी : तळोदा तालुक्यातील ग्रामीण भागातील अनेकजण १ जूननंतरच्या अनलाॅकबाबत उत्सुकतेने माहिती घेत आहेत. तालुक्यात १ जूननंतर विवाह सोहळे व घरगुती कार्यक्रम असल्याने पुढे काय, असा प्रश्न उपस्थित होत आहे. ग्रामस्थ आतापासून नियोजन करत आहेत.
खत व बियाणे खरेदीकडे शेतकऱ्यांची पाठच
बोरद : यंदा केंद्र शासनाने खतांच्या दरांमध्ये वाढ केली आहे. यातून तळोदा आणि बोरद येथील खत व बियाणे विक्रीच्या दुकानांमध्ये शुकशुकाट आहे. लाॅकडाऊनमुळे अनेक शेतकऱ्यांचे रब्बी उत्पादन बाजारात विक्री होऊ शकले नाही. उत्पादन चांगले आले असले तरीही त्याला चांगला भाव मिळाला नाही, परिणामी खत व बियाणे खरेदीबाबत शेतकरी अद्याप तरी अनुत्सुक आहेत.
पावसाळ्यापूर्वी दुरुस्ती कामांची गरज
धडगाव : तालुक्यातील प्राथमिक आरोग्य केंद्र व कर्मचारी निवासस्थाने यांच्या दुरुस्त्या करण्याची मागणी होत आहे. पावसाळ्यापूर्वी या इमारतींची दुरुस्ती करण्याची अपेक्षा व्यक्त करण्यात येत आहे. सर्वच ठिकाणी दुरुस्त्या गरजेच्या आहेत.
लसींचा पुरवठा करण्याची मागणी
धडगाव : सातपुड्याच्या दुर्गम भागात पावसाळ्यात सर्पदंशांने मृत्यू ओढावण्याच्या अनेक घटना घडतात. यातून दुर्गम भागातील नागरिकांचा जीव वाचवण्यासाठी त्या त्या भागातील प्राथमिक आरोग्य केंद्रांमध्ये लसींचा साठा करण्याची मागणी होत आहे.
दुर्गम भागात घर दुरुस्तीच्या कामांना वेग
मोलगी : अक्कलकुवा तालुक्यातील सातपुड्याच्या दुर्गम भागात पावसाळ्यापूर्वी घरदुरुस्तीच्या कामांना वेग आला आहे. यात घरांवरची काैले दुरुस्ती करण्यासह त्यावर प्लॅस्टिक टाकण्याची लगबग सुरू आहे. पावसाळ्यात पावसाचा जोर अधिक असल्याने छत मजबुतीवर भर देण्यात येत आहे. यासाठी अनेक ठिकाणी लाकडाच्या नवीन दांड्या तयार करण्याचे काम सुरू आहे.
हिंस्त्र प्राण्यांचा संचार पुन्हा वाढला
बोरद : तळोदा तालुक्यातील बोरद परिसरात हिंस्त्र प्राण्यांचा संचार सुरू असल्याचे सांगण्यात येत आहे. सकाळी शेतशिवारात जाणाऱ्या शेतकऱ्यांना बिबट्या व अस्वलांच्या पावलांचे ठसे आढळून येत आहेत. वनविभागाने याकडे लक्ष देण्याची मागणी आहे.
अक्कलकुवा शहरात बेशिस्त कायम
अक्कलकुवा : शहरातील बाजारपेठेत दररोज सकाळी नागरिक गर्दी करून नियमांचा भंग करत आहेत. दुकानांमध्ये वस्तूंच्या खरेदीसाठी मोठी गर्दी होत असल्याने कोरोना संसर्गाची भीती आहे. पोलिसांकडून समज देऊनही बेशिस्त कायम आहे.
खोदकामामुळे अपघात वाढले
नंदुरबार : शहरातील जयचंद नगरात जाणाऱ्या रस्त्यावर काही दिवसांपूर्वी केलेल्या खोदकामावर पुन्हा खड्डा करून पाइपलाइन दुरुस्तीचे काम करण्यात आले. यामुळे मार्गावरून प्रवास करणाऱ्या वाहनांचे अपघात होत आहे. याठिकाणी योग्य पद्धतीने दुरुस्तीची गरज आहे.
ग्रामीण भागातील मद्यविक्री वाढली
नंदुरबार : तालुक्याच्या विविध भागात गावठी दारूच्या विक्रीत वाढ झाली आहे. सायंकाळच्या वेळी गावोगावी अवैध गावठी दारू विक्री सुरू असून, याकडे संबंधित विभागाने लक्ष देऊन कारवाई करण्याची मागणी आहे. दारूमुळे अनेक ठिकाणी वादही होत आहेत.