नर्मदा नवनिर्माण अभियानांतर्गत सुरू असलेल्या जीवन शाळांमधील विद्यार्थ्यांचा तीन दिवसीय बालमेळावा शुक्रवारपासून चिखली पुनर्वसन, ता.शहादा येथे सुरू आहे. या मेळाव्यात १३ जीवन शाळांमधील सुमारे ६०० विद्यार्थी सहभागी झाले आहेत. विविध देशी खेळांबरोबरच मैदानी स्पर्धा घेण्यात येत आहेत. साहजिकच यामुळे आदिवासी विद्यार्थ्यांच्या कलागुणांना वाव मिळत आहे. या बालमेळाव्यात विद्यार्थी व विद्यार्थिनींनी स्वतःच्या हस्तकलेतून बनविलेल्या वस्तूंचे प्रदर्शन मांडण्यात आले आहे. घरगुती साहित्यापासून बनविलेल्या अनेक वस्तू विद्यार्थांनी मांडलेल्या आहेत. त्यातील बांबूच्या सहाय्याने बनविलेला लाकडी बंगला सर्वांचेच लक्ष वेधून घेत आहे. हा बंगला आकर्षक रंगरंगोटीद्वारे सजविला आहे. या वस्तू पाहून विद्यार्थ्यांचे पालक व बाहेरून आलेल्या पाहुण्यांनी कौतुक केले आहे.
दरम्यान, शुक्रवारी रात्री विद्यार्थ्यांनी सांस्कृतिक कार्यक्रमात देशभक्तीपर गीते, आदिवासी लोकगीते, नाटिका सादर केल्या. त्यातून प्रेक्षकांचे चांगले मनोरंजन झाले. रविवारी दुपारी तीन वाजता या बालमेळाव्याचा समारोप होणार असल्याची माहिती आयोजकांनी दिली.