नंदुरबार : रेल्वे ट्रॅकवर काम करताना धावत्या रेल्वेखाली आल्याने एका कर्मचाऱ्याचा जागीच मृत्यू झाला तर दुसरा कर्मचारी गंभीर जखमी झाल्याची घटना खांडबारा रेल्वेस्थानकानजीक घडली. रविवार, २८ रोजी सकाळी ही घटना घडली. यामुळे खळबळ उडाली आहे.
इसऱ्या जिवल्या कोकणी (वय ५५, रा.वडदा, ता.खांडबारा) असे मयताचे नाव असून रणजित विश्वास कोकणी (रा.श्रावणी) असे जखमीचे नाव आहे.
मिळालेल्या माहितीनुसार, सुरत-भुसावळ रेल्वेमार्गावर खांडबारा स्थानकातील ट्रॅकमॅन इसऱ्या कोकणी व रणजित कोकणी हे काम करीत होते. सकाळी १० वाजेच्या सुमारास अचानक आलेल्या हापा-विलासपूर या एक्सप्रेसमुळे ते भांबावले. रेल्वेरुळावरून पळण्याचा प्रयत्नात असताना इसऱ्या कोकणी हे सुपरफास्ट रेल्वेखाली आल्याने चिरडले गेेले. त्यामुळे त्यांचा जागीच मृत्यू झाला. तर रणजित कोकणी यांचा पाय रेल्वेखाली आल्याने पाय कापला गेला. त्यात ते गंभीर जखमी झाले. तातडीने रेल्वे कर्मचारी घटनास्थळी धावले. त्यांनी जखमी रणजित कोकणी यांना रुग्णालयात दाखल केले. या घटनेमुळे रेल्वे वर्तुळात एकच खळबळ उडाली आहे.
याबाबत सायंकाळी उशिरापर्यंत पोलिसांत नोंद करण्याचे काम सुरू होते.
दरम्यान, यापूर्वी अर्थात तीन दिवसांपूर्वी नंदुरबार रेल्वेस्थानकात देखील रेल्वे कर्मचाऱ्याचा काम करताना रेल्वेखाली आल्याने मृत्यू झाला होता. त्यानंतर ही दुसरी घटना घडली. यामुळे रेल्वे कर्मचाऱ्यांमध्ये भीती निर्माण झाली आहे. या घटनांची चौकशी करण्याची मागणी होत आहे.