रॉड तुटल्याने ट्रकची डंपर व मोटारसायकलींना धडक

लोकमत न्यूज नेटवर्कशहादा : तालुक्यातील लोणखेडा गावालगत शर्मा हॉटेलसमोर सोमवारी रात्री साडेनऊ वाजेच्या सुमारास ट्रकच्या पुढील चाकाचे रॉड तुटून चालकाचा वाहनावरील ताबा सुटल्याने समोर असलेल्या डंपरसह दोन मोटारसायकली व एक ठेला गाडीला धडक दिल्याने वाहनांची मोडतोड झाली. या अपघातात जिवीतहानी झाली नसली तरी एका मोटारसायकलचा चुराडा झाला.सोमवारी रात्री साडेनऊ ते दहा वाजेच्या सुमारास खेतियाकडून शहाद्याकडे येणाऱ्या ट्रकने (क्रमांक एम.पी.०९- एचजी ४२६०) लोणखेडा चौफुलीलागत असलेल्या शर्मा रेस्टारंटसमोर उभा असलेला डंपर (क्रमांक एम.एच.०४ ईएल-०९१२) रस्त्याच्या बाजूला उभा होता. त्याच्या पाठीमागे एक आमलेट व नाश्त्याची हातगाडीसह दोन मोटरसायकली उभ्या होत्या. या ट्रकचे पुढील चाकाचे रॉड तुटल्याने चालकाचा वाहनावरील ताबा सुटल्याने डंपरसह मोटारसायकल व हातगाडीला धडक दिली. यात वाहनांसह हातगाडीचे नुकसान झाले. याबाबत शहादा पोलीस स्टेशनला अपघाताची नोंद करण्यात आली आहे.