लोकमत न्यूज नेटवर्कअक्कलकुवा : अक्कलकुवा पोलीस ठाणे हद्दीत सार्वजनिक गणेश मंडळे, वैयक्तिक मूर्ती स्थापना आणि एक गाव एक गणपती या संकल्पनेनुसार ४१ मंडळांकडून गणेशोत्सव साजरा होतो़ यंदा मात्र कोरोनाच्या पार्श्वभूमीवर सर्वच मंडळे घरगुती पद्धतीने उत्सव साजरा करत आहेत़यंदा कोरोना महामारीचे संकट आल्यामुळे या मंडळांनी शासनाच्या निर्देशनाने उत्सव साजरा करण्यास सहमती दिली होती़ उपविभागीय पोलिस अधिकारी विक्रम कदम, पोलीस निरीक्षक मेघश्याम डांगे यांनी याबाबत आवाहन केल्यानंतर मंडळांनी साधेपणाने उत्सव साजरा करण्यावर यंदा भर दिला आहे़ उत्सवाच्या पार्श्वभूमीवर पोलीस ठाण्याचे सहाय्यक पोलीस निरीक्षक डी़डी़पाटील, पोलीस उपनिरीक्षक ज्ञानेश्वर बडगुजर, पोलीस उपनिरीक्षक रूपाली महाजन, पोलीस कॉन्स्टेबल अमोल खवळे, खुशाल माळी आदींकडून वेळोवेळी मंडळांसोबत संपर्क करुन आढावा घेतला जात आहे़अक्कलकुवा शहरातील विविध भागात स्थापन केलेल्या घरगुती गणेशोत्सवात साधेपणा दिसून येत आहे़
अक्कलकुवा ,खापर आणि वाण्याविहीर येथे १६ सार्वजनिक, १३ घरगुती आणि १२ गावांमध्ये एक गाव एक गणपती ही संकल्पना राबवली जाते़ यंदा ही सर्व मंडळे साधेपणाने उत्सव साजरा करण्यासह कोरोनामुक्तीबाबत जागृती करण्यावर भर देत आहेत़ त्यांच्याकडून तशी माहिती भाविकांना दिली जात आहे़ याबाबत पोलीस निरीक्षक मेघश्याम डांगे यांनी सांगितले की, सर्वच मंडळांनी पोलीसांच्या आवाहनाला प्रतिसाद देत उत्सव साधेपणाने साजरा केला आहे़ मंडळांनी घेतलेला पुढाकार कौतूकास्पद आहे़