शहादा-धडगाव दरम्यान प्रवासी वाहनातून पडल्याने पतीचा मृत्यू

पत्नी जखमी : शहादा-धडगाव दरम्यान घटना

लोकमत न्यूज नेटवर्कनंदुरबार : धडगाव-शहादा रस्त्यावर भरधाव वेगातील प्रवासी वाहनातून पडल्याने पती-पत्नी जखमी झाले होते़ यात पतीचा मृत्यू झाला असून पत्नीवर रुग्णालयात उपचार सुरु आहेत़ रविवारी दुपारी दीड वाजेदरम्यान धडगाव शिवारात ही घटना घडली़गोविंद मोचडा पावरा (३८) व रिकामीबाई गोविंद पावरा (३४) रा़ आचपा लक्कडपाडा ता़ धडगाव हे पतीपत्नी खाजगी वाहनाने शहादा येथे जात असताना धडगाव गावाच्या पुढे खराब रस्त्यावर वाहनाचा वेग वाढल्याने दोघेही रस्त्यावर फेकले गेले़ यात गोविंद पावरा यांना गंभीर दुखापत झाल्याने त्यांचा उपचारादरम्यान मृत्यू झाला तर रिकामीबाई ह्या गंभीर जखमी झाल्या़ याबाबत रिकामीबाई पावरा यांनी सोमवारी उशिरा पोलीसांना दिलेल्या फिर्यादीवरुन चालक छोटूलाल ढोबा पावरा रा़आमला ता़ धडगाव याच्याविरोधात गुन्हा दाखल करण्यात आला आहे़ तपास पोलीस कॉन्स्टेबल चेतन साळवे करत आहेत़