नंदुरबार : जिल्ह्यात कोरोना रुग्णाचे सलग दुसऱ्या दिवशी शतक पार झाले. तब्बल सहा महिन्यांतर कोरोना रुग्णांचा आकडा शंभर पार झाला होता. गुरुवारी तब्बल १६१ जणांचे अहवाल पॅाझिटिव्ह आले होते तर शुक्रवारी ११९ जण कोरोना बाधित आढळून आले आहेत.
जिल्ह्यात गेल्या १५ दिवसांपासून कोरोना बाधितांची संख्या वाढत आहे. नंदुरबार शहर व शहादा शहरात सर्वाधिक रुग्ण आहेत. गुरुवारी १६१ जणांचे अहवाल आले होते, त्यापैकी ९८ जण नंदुरबार शहर व परिसरातील होते. शुक्रवारी मात्र रुग्णांच्या संख्येबाबत नंदुरबारला दिलासा मिळाला. केवळ ३७ जण बाधित आढळून आले. परंतु एका जणांचा मृत्यू झाला.
प्रशासनाने जास्तीत जास्त लोकांचे स्वॅब तपासणीसाठी सूचना दिलेल्या आहेत. त्यामुळे स्वॅब संकलन केंद्र नंदुरबार व शहादा शहरात वाढविण्यात येणार आहेत. वाढत्या रुग्ण संख्येमुळे विविध प्रतिबंधात्मक उपाययोजना सुरू करण्यात आल्या आहेत. सायंकाळी सात वाजेनंतर बाजारपेठा बंद राहत आहेत. आता मंगळवार हा आठवडे बाजारदेखील बंद करण्याचा निर्णय घेण्यात आला आहे. नागरिकांनी सहकार्य करण्याचे आवाहन करण्यात येत आहे.