ब्राह्मणपुरी : कोरोनाच्या संसर्गाने नागरिक त्रस्त झाले असले, तरी या काळात निर्माण झालेल्या आर्थिक टंचाईने नागरिकांना खूप काही शिकविले आहे. त्यातूनच पूर्वीच्या तुलनेत होणारे घर खर्च निम्म्यावर आले आहेत.
कोरोना काळात शासनस्तरावर लॉकडाऊनचे कडक निर्बंध लागू करण्यात आले. यामुळे बाजारपेठेतील सर्वच दुकाने अनेक दिवस बंद राहिली. यामुळे व्यावसायिक, उद्योजक अडचणीत सापडल्याने त्यांच्याकडे काम करीत असलेल्या अनेकांच्या नोकऱ्यांवर समस्या आली. विशेषत: खासगी क्षेत्रात कार्यरत अनेक कर्मचाऱ्यांचे पगार कमी झाले. बाजारपेठेत छोटी दुकाने थाटणाऱ्यांवर तसेच रिक्षाचालकांवरही आर्थिक संकट कोसळले. त्यामुळे अनेकांनी काटकसरीचा पर्याय स्वीकारला असून, प्रत्येक घरात किचनपासून कटिंगपर्यंत कॉस्टकटिंग सुरू झाले आहे.
कुठे कुठे केली कॉस्टकटिंग
शाळा नसल्याने मुलांवरील खर्चही कमी होत आहे.
लागतील तेवढ्याच भाज्या खरेदी केल्या जात आहेत. त्याचबरोबर उदरनिर्वाहासाठी भाजीपाला व्यवसायाबरोबर घरीच केक बनविला जात आहे.
घरात कंटाळा आला म्हणून आणण्यात येणारे पार्सल बंद होऊन घरातच स्वयंपाक केला जात आहे.
ब्यूटी पार्लरमधील वेगवेगळे मेकअप करण्यावर महिलांचे हजारो रुपये खर्च होत होते. कोरोनाकाळात ब्यूटी पार्लर बंद होते. कार्यक्रमही बंद होते. त्यामुळे महागडा मेकअप लावण्याची गरज राहिली नसल्याने यातून बराच खर्च वाचला आहे. पुरुष वर्गानेही चेहऱ्याचा मसाज बंद केला. सेव्हिंगही घरीच उरकली जात आहे.
तेलाच्या वाढत्या किमतींमुळे अनेक गृहिणींनी आपल्या दैनंदिन स्वयंपाकात तेलाचा वापर कमी करण्याचे धोरण राबविले. तसेच विजेची बचत करण्यासाठी अनावश्यक विजेचा वापर टाळला.
कपडे, लग्न समारंभ, फिरणे टाळले
आम्ही कपडे, लग्न समारंभ, फिरणे टाळले असून, खर्चावर मर्यादा आणली आहे. कोरोना संकट काळापूर्वी दरवर्षी बाहेरगावी जाणे-येणे सुरू होते. परंतु कोरोना संकट काळापासून बाहेरगावी येणे-जाणे बंद केले आहे. - उजनबाई चिंधा राजपूत, ब्राह्मणपुरी, ता. शहादा
दैनंदिन खर्चात केली कपात
कोरोनामुळे उत्पन्न कमी झाले असतानाच दुसरीकडे महागाईने कळस गाठला आहे. यामुळे घरात लागणाऱ्या साहित्याच्या खर्चात कपात केली आहे. - शीतल कन्हैया मराठे, गृहिणी, ब्राह्मणपुरी
परिस्थिती काटकसरीने सावरत आहे
प्रशासनाने लॉकडाऊन शिथिल केल्याने काही प्रमाणात रिक्षा व्यवसाय सुरू झाला आहे. मात्र, प्रवासी नेण्याची मुभा आणि रिक्षात बसण्यास लोकांच्या मनात असलेली भीती यांमुळे दिवसभर थांबूनही चार पैसे मिळताना मारामार होत आहे. त्यामुळे उत्पन्न आणि खर्चाचा ताळमेळ बसविताना कसरत होत आहे. यामुळे दैनंदिन खर्च काटकसरीने करीत आहे. - कामिनी विनोद पाटील, सुलतानपूर, ता. शहादा.
भाजीपाला घरीच लागवड करण्यात येत आहे
दाढी-कटिंग घरीच केली जात आहे
केक घरीच तयार करण्यात येत आहे.
नवीन कपडे तसेच समारंभाला जाणे टाळले जात आहे.
ब्युटी पार्लरमध्ये जाणे बंद.
किराणा, भाजीपाला, दैनंदिन खर्चावर मर्यादा आल्या आहेत.