तोरखेडा येथे सलग तीन दिवस बंद

तापी पट्ट्यातील तोरखेडा, वडाळी, सारंखेडा या ग्रामीण भागातील प्रमुख बाजारपेठेच्या मोठ्या गावांमध्ये व्यापारी व ग्रामस्थांनी स्वयंस्फूर्तीने जनता कर्फ्यू पाळला. त्यासाठी सारंगखेडा पोलीस ठाण्याचे पोलीस निरीक्षक राजेश शिरसाठ यांनी बैठका घेऊन आवाहन केले होते. तोरखेडा, वडाळी, सारंगखेडा या ग्रामीण भागातील प्रमुख बाजारपेठेतील प्रमुख गावे आहेत. या गावांच्या परिसरातील ग्रामस्थांचा रोजच्या दैनंदिन कामानिमित्त संबंध येतो. मात्र ग्रामपंचायत प्रशासन व ग्रामस्थ मिळून स्वयंस्फूर्तीने बैठक घेऊन कोरोनाला हरवण्याचा निर्धार करुन शनिवार-रविवार जनता कर्फ्यू पाळण्याच्या निर्णय घेण्यात आला. त्याला सर्वांनी प्रतिसाद दिला. यापुढेही कोरोना संसर्ग टाळण्यासाठी प्रशासकीय नियमावलीचे पालन करून शासनास सहकार्य करण्याचा निर्धार केला. तोरखेडा येथे शनिवार, रविवार व सोमवारी आठवडे बाजाराचा दिवस असल्याने सतत तीन दिवस बंद राहणार आहे. कोरोना संसर्गाला प्रतिबंद करण्यासाठी सुरू असलेल्या उपाययोजनांवर सारंगखेडाचे पोलीस निरीक्षक राजेश शिरसाठ, जि.प.चेमाजी उपाध्यक्ष जयपालसिंह रावल, सारंगखेडाचे सरपंच पृथ्वीराजसिंग रावल, ग्रामविकास अधिकारी संजय मंडळे, तोरखेड्याच्या सरपंच मनीषा गरुड, मनीष गरुड, उपसरपंच परशुराम रामोळे, पोलीस पाटील दयाराम चौधरी, ग्रामसेवक मधुकर काळे, दीपक चौधरी, बापू शेळके, वडाळी पं.स.चे माजी सदस्य गिरीश जगताप, सरपंच जामसिंग ठाकरे, उपसरपंच हिंमत सोनवणे, पोलीस पाटील गजेंद्र गोसावी, ग्रामविकास अधिकारी बी.बी. देसले आदी लक्ष ठेवून आहेत.