कोठार : तळोदा पालिकेच्या गुरुवारी झालेल्या सर्वसाधारण सभेत उपनगराध्यक्षा भाग्यश्री चौधरी सहभागी न होता पालिकेमार्फत सुरू असणाऱ्या विकासकामांध्ये गैरव्यवहार व टक्केवारीचे आरोप करत नगराध्यक्ष व मुख्याधिकारी यांच्या दालनासमोर लाक्षणिक उपोषण केल्याने ही सर्वसाधारण सभा वादग्रस्त ठरली. नगरपालिकेच्या घेण्यात आलेल्या सर्वसाधारण सभेत सर्व ४७ विषयांना सर्वानुमते मंजुरी देण्यात आली.
तळोदा नगरपरिषदेच्या सभागृहात नगराध्यक्ष अजय परदेशी यांच्या अध्यक्षतेखाली सर्वसाधारण सभेचे आयोजन करण्यात आले होते.
या सभेला नगरसेवक योगेश पाडवी, सुरेश पाडवी, अंबिका शेंडे, सुनयना उदासी, बेबीबाई पाडवी, शोभाबाई भोई, सुरेश पाडवी, सविता पाडवी, अमानुद्दीन शेख, हेमलाल मगरे, काँग्रेसचे प्रतोद संजय माळी, गटनेते गौरव वाणी, नगरसेवक हितेंद्र क्षत्रिय, जितेंद्र सूर्यवंशी, अनिता परदेशी, कल्पना पाडवी आदी उपस्थित होते. या सभेमध्ये उपनगराध्यक्षा भाग्यश्री चौधरी यांच्यासह नगरसेवक रामानंद ठाकरे, भास्कर मराठे, नगरसेविका प्रतीक्षा ठाकूर आदी सभेमध्ये सहभागी झाले नाही. मुख्याधिकारी सपना वसावे यांनी सभेचे कामकाज पाहिले. कोरोना कालावधीनंतर प्रथमच सभा ऑनलाइन न घेता सभागृहात घेण्यात आली.
गुरुवारी झालेल्या सर्वसाधारण सभेमध्ये नगरसेवकांनी सभेच्या अजेंड्यावरील विषयावर चर्चा केली. एकूणच या सभेच्या अजेंड्यावर ४७ विषय घेण्यात आले होते. यात ईपीएफ सल्लागाराची निवड होणे, १५ व्या वित्त आयोगाच्या निधीतून शासन निर्णय व मार्गदर्शक तत्त्वांच्या अनुषंगाने खर्च करण्यास मंजुरी मिळणे, नगरपरिषद कार्यालयातील विविध विभागासाठी कुशल, अकुशल व अर्धकुशल कामगार पुरवण्याची निविदा रद्द करणे व पुरविणे याबाबत विचार विनिमय करणे, स्वच्छतेबाबत भिंतींवर रंगकाम, घोषवाक्य, सुविचार व डिजिटल बॅनर इत्यादी अनुषंगिक खर्चास मंजुरी देणे, आमदार निधीतून शहादा रोड येथे साऊंड सिस्टिम बसविण्यात येणाऱ्या खर्चास मंजुरी मिळणे, नगरपरिषदेच्या नूतन इमारतीमध्ये ऊर्जा संवर्धनासाठी पथदर्शी प्रकल्प राबविणे व पाणीपुरवठा योजनांसाठी ऊर्जा बचतीसाठी सयंत्र स्थापित करण्यास मंजुरी मिळणे, तळोदा नगरपरिषद कार्यालयांमध्ये दस्तऐवज सुरक्षित जतन करण्यासाठी ॲडव्हान्स डॉक्युमेंट मॅनेजमेंट सिस्टिम स्थापित करणे, तळोदा नगरपरिषद हद्दीचा विकास आराखडा भौगोलिक माहिती प्रणालीद्वारे तयार करणे, नगररचना अधिकारी तथा सहायक संचालक नगर रचना विभाग, शाखा नंदुरबार यांना विकास योजना तयार करण्याच्या कामात सहकार्य करण्यासाठी अनुभवी कंत्राटदार, शासकीय, निमशासकीय संस्थांकडून निविदाद्वारे नेमणूक करण्याबाबत येणाऱ्या खर्चास मंजुरी मिळणे, आरोग्य निरीक्षक यांच्या रिपोर्टनुसार साइंटिफिक अल लांडफिल्ल प्रकल्प उभारणेबाबत विचार विनिमय रेन वॉटर हार्वेस्टिंगच्या विकास कामांना मंजुरी मिळणे, सफाई कर्मचाऱ्यांना शासकीय सुट्ट्यांचा पगार देणेबाबत आमदार निधीतून कार्यालयीन कामकाज या करता संगणक संच व संगणक साहित्य खरेदी करणे, माझी वसुंधरा अभियानांतर्गत विद्युत वाहनांना प्रोत्साहित चार्जिंग पण उपलब्ध करून देणे, गिरीधर आप्पा नगर व चाणक्यपुरी नगरमधील मोकळ्या जागेत सामाजिक सभागृह बांधकाम करणे, आदींसह शहरातील विविध प्रभागांत पायाभूत विकास कामांच्या ठरावांना या सर्वसाधारण बैठकीत सर्वानुमते मंजुरी देण्यात आली.
दरम्यान ठराव क्रमांक ४४ नुसार तळोदा नगरपरिषदेच्या नवीन व्यापारी संकुल क्रमांक एकला 'राष्ट्रपिता महात्मा ज्योतिराव फुले व्यापारी संकुल' व्यापारी संकुल क्रमांक दोनला 'क्रांतिज्योती सावित्रीबाई फुले व्यापारी संकुल' व व्यापारी संकुल क्रमांक तीनला 'संत शिरोमणी श्री जगनाडे महाराज व्यापारी संकुल' असे नाव देणे, सोबतच प्रभाग क्रमांक दोनमध्ये नगरसेवक हितेंद्र क्षत्रिय व नगरसेविका अनिता परदेशी यांनी स्वखर्चातून उभारलेल्या बगिच्याला तळोदा शहराचे प्रथम नगराध्यक्ष 'कै गोविंद दीनाराम राठोड' हे नाव देण्याचे ठराव पालिकेच्या या सर्वसाधारण सभेमध्ये मांडण्यात आला व त्याला सर्वानुमते मंजुरी देण्यात आली.
तळोदा शहरातील महत्त्वाच्या प्रमुख ठिकाणी सीसीटीव्ही कॅमेरे, सोलर पथदिवे बसविण्याच्या कामाला मुदतवाढ देणे, शहरात विविध ठिकाणी वृक्ष लागवड करून त्याची देखभाल व दुरुस्तीसाठी एजंटची नेमणूक करणे इत्यादी विषयावर आयत्या वेळच्या विषयांमध्ये चर्चा करण्यात आली. दरम्यान स्वीकृत नगरसेवक जितेंद्र सूर्यवंशी यांनी पालिकेच्या सर्वसाधारण सभेची व्हिडिओ रेकॉर्डिंग करण्याची मागणी सभेचे अध्यक्ष नगराध्यक्ष अजय परदेशी व मुख्याधिकारी स्थापना वसावा यांच्याकडे केली. त्याचप्रमाणे व्यापारी संकुलांना राष्ट्रपिता महात्मा फुले व क्रांतिज्योती सावित्रीबाई फुले, संत जगनाडे महाराज याचे नावच केल्याबद्दल त्यांनी पालिकेचे आभारदेखील मानले.
सभा यशस्वीतेसाठी सभा लिपिक नितीन शिरसाठ, प्रशासकीय अधिकारी राजेंद्र माळी, लेखापाल विशाल माळी, संगणक अभियंता सचिन पाटील, बांधकाम अभियंता शंकर गावीत, नगररचना विभागाचे विनीत काबरा, आरोग्य विभागाचे अश्विन परदेशी यांनी परिश्रम घेतले.