भाजीपाल्याच्या गाड्यावर मोबाईल लंपास
नांदेड : शहरातील आनंदनगर ते शारदा नगर रस्त्यावर गाड्यावरून भाजीपाला खरेदी करीत असताना एका प्राध्यापकाचा मोबाईल चोरट्याने लांबविला. ही घटना २३ मार्च रोजी घडली. राहुल सोनसळे हे भाजीपाला खरेदी करीत होते. यावेळी चोरट्याने ८ हजारांचा मोबाईल काढून घेतला. या प्रकरणात विमानतळ पोलीस ठाण्यात गुन्हा नोंद झाला.
ट्रॅक्टर उलटून तरुणाचा मृत्यू
नांदेड : उसाच्या शेतात ट्रॅक्टर पलटी करीत असताना नियंत्रण सुटल्याने ट्रॅक्टर उलटून एका तरुणाचा मृत्यू झाला. ही घटना २५ मार्च रोजी मौजे वजिरगाव येथे घडली.
नायगाव तालुक्यातील मौजे वजिरगाव येथे गजानन रावसाहेब ढगे हा तरुण ट्रॅक्टर चालक अंजनाबाई ढगे यांच्या शेतात एम.एच.२६, बीक्यू ७३१९ या क्रमांकाचा ट्रॅक्टर पलटी करीत होता. त्याचवेळी नियंत्रण सुटल्याने ट्रॅक्टर उलटला. तो ट्रॅक्टर ढगे यांच्या अंगावर पडल्याने त्यांचा मृत्यू झाला. याप्रकरणात कुंटूर पोलिसांनी आकस्मिक मृत्यूची नोंद केली आहे.
खांबावरून पडल्याने युवकाचा मृत्यू
वीज पुरवठा दुरुस्तीचे काम करण्यासाठी खांबावर चढल्यानंतर पाय घसरून पडल्याने एका तरुणाचा मृत्यू झाला. ही घटना २७ मार्च रोजी खुदबईनगर येथे घडली.
शेख सलीम शेख युसूफ हा तरुण वीज पुरवठा दुरुस्तीसाठी खांबावर चढला होता. दुरुस्ती करीत असताना त्याचा पाय घसरून तो डोक्यावर खाली पडला. उपचारासाठी त्याला शासकीय रुग्णालयात दाखल करण्यात आले होते. या ठिकाणी त्याचा मृत्यू झाला. या प्रकरणात शेख मुशरब शेख सलीम यांच्या माहितीवरून नांदेड ग्रामीण पोलिसांनी गुन्हा नोंदविला.