- दत्तात्रय कांबळे
मुखेड : तालुक्यातील निवळी फाटाजवळील गणपती मंदिराजवळ एका दुचाकीस्वाराने ३२ वर्षीय तरुणाचा पाठलाग करून त्यावर गोळीबार केल्याची थरारक घटना मंगळवारी सकाळी ११:४५ वाजेच्या सुमारास घडली. तिरूपती रानबा पापुलवाड असे गोळीबारात गंभीर जखमी झालेल्या तरुणाचे नाव आहे.
तिरूपती रानबा पापुलवाड हा दुचाकीवरून ( एम.एच.२४ ए.पी.३१९४ ) देगलुर तालुक्यातील करडखेल येथील मित्रांना भेटून परत निवळी या मुळगावी येत होता. निवळी फाटाजवळील गणपती मंदिराजवळ येताच पाठीमागून आलेल्या एका दुचाकीस्वाराने त्याच्यावर गोळीबार केला. एक गोळी उजव्या खांद्याला लागल्याने तिरुपती गंभीर जखमी झाला. त्यास मुखेडच्या उपजिल्हा रुग्णालयात उपचारासाठी दाखल करण्यात आले. येथे प्राथमिक उपचार करून त्यास नांदेड येथे अधिक उपचारासाठी रवाना करण्यात आले.
दरम्यान, या घटनेमागे कोण आहे ? गोळीबाराचे कारण अद्याप पुढे आले नसून पोलीस तपास सुरु आहे. सिनेस्टाईल पाठलागकरून केलेल्या गोळीबाराच्या या घटनेने संपूर्ण तालुक्यात भितीचे वातावरण पसरले आहे. घटनास्थळी अप्पर पोलिस अधिक्षक निलेश मोरे,उपविभागीय पोलिस अधिकारी सचिन सांगळे, एलसिबिचे द्वारकादास चिखलिकर, पोलीस निरीक्षक विलास गोबाडे, स.पो.नि कमलाकर गड्डीमे यांनी पाहणी केली.