शेतकऱ्याजवळील दोन मोबाइल लंपास
लोहा : तालुक्यातील गोळेगाव येथे एका शेतकऱ्याजवळील बारा हजार रुपये किमतीचे दोन मोबाइल लंपास करण्यात आले. ही घटना १५ ऑगस्ट रोजी घडली. या प्रकरणात राजेश श्रीराम मोरे यांच्या तक्रारीवरून उस्माननगर पोलीस ठाण्यात गुन्हा नोंद झाला.
रोहित्रातील तार आणि ऑइल काढले
कंधार शहरातील राम रहिमनगर भागात एका शेतात बसविण्यात आलेले रोहित्र खाली पाडून त्यातील ३५ हजार रुपये किमतीची तांब्याची तार आणि ऑइल चोरट्याने लांबविले. ही घटना १४ ऑगस्ट रोजी घडली. या प्रकरणात सहाय्यक अभियंता नितीन ननावरे यांनी ठाण्यात तक्रार दिली.
रुग्णवाहिकेतील ऑक्सिजन व्हेंटिलेटर चोरीला
शहरातील भगवती हॉस्पिटलसमोर उभ्या असलेल्या एमएच २६ एन ९१४६ या क्रमांकाच्या रुग्णवाहिकेतील ५० हजार रुपये किमतीचे ऑक्सिजन व्हेंटिलेटर चोरट्याने लांबविले. ही घटना ३० जुलै रोजी घडली. या प्रकरणात कंत्राटदार स्वाती रासकटला यांच्या तक्रारीवरून शिवाजीनगर पोलिसांनी गुन्हा नोंद केला.
फ्लॅटच्या मागणीसाठी विवाहितेचा छळ
हैदराबाद येथील एका पीडितेला फ्लॅट घेण्यासाठी माहेराहून दहा लाख रुपये आणण्याची मागणी करण्यात आली होती. या मागणीसाठी पीडितेला उपाशीपोटी ठेवून मारहाण केली. या प्रकरणात पीडितेच्या तक्रारीवरून इतवारा पोलिसांनी चंदन लालचंद लालवाणी, पूनम लालवाणी यांच्या विरोधात गुन्हा नोंद झाला.