महिलेचे मंगळसूत्र हिसकावले
नांदेड : फिरायला जात असलेल्या हदगाव तालुक्यातील तळेगाव येथील सुवर्णमालाबाई मनोज जाधव या महिलेचे मंगळसूत्र चोरट्यांनी सोमवारी हिसकावले. सुवर्णमालाबाई या पती व लहान मुलासह तामसा ते नांदेड रस्त्यावर फिरायला गेले होते. त्यावेळी दुचाकीवरून आलेल्या चोरट्याने १९ हजाराचे मंगळसूत्र लंपास केले.
इतवारा भागात दुकान फोडले
नांदेड : जुन्या नांदेडातील इतवारा भागात जि.प. हायस्कूलजवळ असलेले श्रुती कॉमन सर्व्हिस ऑनलाइन दुकान फोडून दुकानातील कॅमेरा, एलसीडी, मॉनिटर व रोख रक्कम असा ६ हजार ३०० रुपयांचा मुद्देमाल चोरून नेला. याप्रकरणी मुंजाजी लहाने यांच्या तक्रारीवरून इतवारा ठाण्यात गुन्हा दाखल केला आहे.
सर्पदंशाने मृत्यू
नांदेड : नवीन कौठा येथील सुमित्रा बळीराम पांचाळ यांचा सर्पदंशाने मृत्यू झाल्या. पांचाळ या घरात झोपल्या असता त्यांच्या पायाला सापाने चावा घेतला. उपचारासाठी शासकीय रुग्णालयात दाखल केले असता उपचारादरम्यान त्यांचा मृत्यू झाला. याप्रकरणी नांदेड ग्रामीण ठाण्यात गुन्हा दाखल केला.
मटका चालकाविरुद्ध गुन्हा
नांदेड : जुन्या नांदेडातील कुंभारगल्ली भागात कल्याण ओपन मिलन नावाचा मटका सुरू होता. या मटका अड्ड्यावर पोलिसांनी धाड टाकून १ हजार ५२० रुपयांचा मुद्देमाल जप्त केला. याप्रकरणी मनोज परदेशी यांच्या तक्रारीवरून वजिराबाद ठाण्यात गुन्हा दाखल केला आहे.