- श्रीनिवास भोसले
नांदेड : माझा राजीनामा देऊन मराठा समाजाच्या आरक्षणाचा प्रश्न सुटणार असेल, समाजाला न्याय मिळत असेल तर मी खासदारकीचा राजीनामा देईन, असे आक्रमक मत राज्यसभा खासदार छत्रपती संभाजीराजे यांनी व्यक्त केले. तसेच मराठा समाजाला आरक्षण मिळवून देण्यासाठी सर्वांनी जातीय आणि पक्षीय भेदभाव सारून एकत्र यावे, असे आवाहन त्यांनी केले.
खासदार संभाजीराजे भोसले यांनी मराठा आरक्षणाबाबत आक्रमक भूमिका घेतली असून पुढील दिशा ठरवण्यासाठी राज्यव्यापी दौरा सुरू केला आहे. ते मंगळवारी नांदेड जिल्हा दौऱ्यावर होते. दरम्यान, शासकीय विश्रामगृह येथे पार पडलेल्या बैठकीत त्यांनी मराठा समाजाच्या विविध संघटनेचे पदाधिकारी, कायदेतज्ज्ञ आणि आरक्षण अभ्यासक यांची मते जाणून घेतली. त्यानंतर पत्रकारांशी संवाद साधला.
खासदार संभाजीराजे म्हणाले, आरक्षणाची मागणी पूर्ण करण्यासाठी पुन्हा लढा उभा करण्याची गरज आहे. परंतु, हा लढा कार्यकर्त्यांनी नाही तर त्यांनी निवडून दिलेल्या आमदार, खासदार यांनी उभा करण्याची गरज आहे. मराठा आरक्षणासाठी आंदोलन करणं हा एक भाग आहे. पण त्यासोबतच इतर पर्यायी मार्ग काय आहेत हे शोधण्यासाठी हा दौरा असल्याचं त्यांनी सांगितलं. मराठा आरक्षण न्यायालयात टिकण्यासाठी राज्य आणि केंद्र सरकारला काय सूचना देऊ शकतो याचा अभ्यास या दौऱ्यादरम्यान करणार असल्याचं संभाजीराजे यांनी सांगितले. कोरोना काळात जनतेने रस्त्यावर उतरून स्वतःचा जीव धोक्यात घालू नये, आपण केंद्र आणि राज्य सरकारमधील प्रमुख नेत्याना भेटून आरक्षणप्रश्नी चर्चा करणार आहोत. मुख्यमंत्री, विरोधी पक्षनेते आणि ज्येष्ठ नेते शरद पवार यांच्या भेटीनंतर आपण काय ती भूमिका माध्यमासमोर 27 किंवा 28 मे रोजी मांडणार आहोत, असे त्यांनी सांगितले.
राजे काय भूमिका घेणार याकडे संबंध समाजाचे लक्ष लागले आहे. दरम्यान, मराठा समाजाचे नुकसान होणार नाही यासाठी काय काय उपाययोजना करता येतील? सारथीचा उपयोग अधिकाधिक विद्यार्थ्यांपर्यंत कसा पोहोचवता येईल, शिष्यवृत्ती योजना, वसतिगृह आदींबाबत काही धोरण निश्चित करता येईल का, असे अनेक मार्ग आणि पर्याय मुख्यमंत्र्यांसोबत चर्चिले जाणार आहेत, असे खासदार संभाजीराजे यांनी सांगितले. गिरीश कुबेर यांच्या पुस्तकावर सडकून टीका करत अशा लेखकांना महाराष्ट्रात फिरकू देऊ नये, असे आवाहन त्यांनी केले. यावेळी विविध संघटनांचे पदाधिकारी कार्यकर्ते उपस्थित होते.
आंदोलनाची पुढची दिशा ठरवण्यासाठी दौरा आरक्षणाचे जनक राजश्री शाहू छत्रपती महाराज यांच्या समाधी स्थळाला अभिवादन करून या दौऱ्याला कोल्हापूर इथून सुरुवात झाली कोल्हापूर-पंढरपूर-सोलापूर-तुळजापूर-उस्मानाबाद-नांदेड असा त्यांचा दौरा झाला आहे. पुढे ते जालना, औरंगाबाद असा दौरा करणार आहेत. आंदोलनाची पुढची दिशा ठरवण्यासाठी हा दौरा महत्त्वाचा असल्याचं बोललं जातंय.