शेतकऱ्याचे नुकसान
उमरी : तालुक्यातील सावरगाव दक्षिण येथे जनावराच्या गोठ्याला शाॅर्टसर्किटमुळे आग लागून कडबा व शेती अवजारे जळून खाक झाली. शेतकरी उत्तम जगदेकर, आनंद जगदेकर, भीमराव जगदेकर, बालाजी दुधमल यांच्या गोठ्याला आग लागून उपरोक्त प्रमाणे नुकसान झाले. यात शेतीला पाणी देण्यासाठी ठेवलेले पाइपही जळाले. कार्ला सज्जाचे तलाठी सोनार यांनी घटनास्थळी भेट देऊन पंचनामा केला.
अवैध दारू विक्री करणारे पकडले
धर्माबाद : तालुक्यातील सायखेड येथे एका किराणा दुकान तसेच हॉटेलमधून देशी व विदेशी दारूची विक्री सुरू होती. याबाबतची माहिती मिळताच सहायक पोलीस निरीक्षक शिवप्रसाद कत्ते व त्यांच्या सहकाऱ्याने तेथे जाऊन छापा मारला. यावेळी ६ हजार ९३० रुपयांची देशी, विदेशी दारू जप्त करण्यात आली. याप्रकरणी श्रीनिवास यम्मेवार, नागोराव वडपत्रे यांना अटक करण्यात आली.
कोरोना प्रतिबंधक लस
हिमायतनगर : तालुक्यातील बेल्लोरी-धानोरा प्राथमिक आरोग्य केंद्रात कोरोना प्रतिबंधक लसीकरणाचा शुभारंभ जि.प. सदस्या कमलताई हुरदुके, सरपंच शामराव हुरदुके यांच्या हस्ते झाला. यावेळी वैद्यकीय अधिकारी डॉ.डोळस, परिचारिका ठाकरे, हातोडे, श्रीमंगले, सुपरवायझर तांबारे, चव्हाण, राठोड, वाघमारे, खुडे आदी उपस्थित होते.
रस्त्याच्या कामाला सुरुवात
हदगाव : तालुक्यातील पळसा येथून एक कि.मी. अंतरावरील किन्हाळा येथे कठीण रस्त्याच्या कामाला सुरुवात झाली. गावात रस्ताच नसल्यामुळे काही जणांनी आ. माधवराव जवळगावकर यांच्याकडे रस्त्याची मागणी केली होती. जवळगावकर यांनी स्थानिक विकास निधीतून १२ लाख रुपयांची मंजुरी दिली. सुभाष राठोड यांनी कामाला सुरुवात केली. यावेळी सरपंच प्रतिभा वाढवे, माजी सरपंच रमेश राठोड, कुबेर राठोड, समीर पटेल, अनुसयाबाई जाधव, विजय राठोड, चंद्रकला राठोड आदी उपस्थित होते.
कुंटूरकर यांना श्रद्धांजली
बिलाेली : बिलोली येथे कै. गंगाधरराव कुंटूरकर यांना श्रद्धांजली वाहण्यात आली. यावेळी जि.प. सदस्य लक्ष्मणराव ठक्करवाड, राष्ट्रवादीचे नागनाथराव पाटील, गंगाधर प्रचंड, माजी नगराध्यक्ष भीमराव जेठे, विजय मुंडकर, लक्ष्मणराव पाटील, गौसोद्दीन कुरेशी, सदाशिव बोडके, ॲड. बाबूराव देशमुख, इंद्रजित तुडमे, राजू पाटील, विठ्ठल चंदनकर, लक्ष्मण शेटीवार, दादाराव इंगळे, बाबूराव इंगळे, शेख रियाज, रणजित हिवराळे आदी उपस्थित होते.
१० हजारांची दारू जप्त
देगलूर : तालुक्यातील हणेगाव येथे पेट्रोलपंपासमोर छापा टाकून पोलिसांनी ९ हजार ९८४ रुपयांची अवैध दारू व दुचाकी जप्त केल्याची घटना १ एप्रिल रोजी रात्री घडली. यावेळी एम.एच. २६ बी.एस. ७१५७ या क्रमांकाची दुचाकीही पोलिसांनी जप्त केली. जमादार मोहन कनकवळे यांनी ही कारवाई केली. मरखेल पोलिसांत या घटनेची नोंद झाली.
हळदा येथे लसीकरण
भोकर : तालुक्यातील मोघाळी प्रा.आ. केंद्रांतर्गत हळदा येथील उपकेंद्रात माजी सरपंच बालाजी नारलेवाड यांच्या हस्ते लसीकरणाला प्रारंभ करण्यात आला. यावेळी सरपंच बाबूराव नागमोड, सदस्य चंद्रकांत नागमोड, विलास किसवे, शंकरराव पेरेवार, सुरेश इडेवार आदी उपस्थित होते. यावेळी ४५ वर्षांवरील नागरिक व महिलांना लस देण्यात आली.
घराला लागली आग
किनवट : शहरातील रामनगर परिसरातील एका घराला आग लागली. यात रोख ४५ हजार रुपये जळून खाक झाले. सोमवारी सकाळी ही घटना घडली. वाऱ्यामुळे आगीची ठिणगी याेगेश पाध्ये यांच्या टीनशेडच्या घरावर उडाली. पत्रावर असलेल्या लाकडाने पेट घेऊन आग पसरली. घरात एक महिला व दोन पुरुष होते. आगीचे लोट दिसताच तिघेही घराबाहेर पडले. पाहता पाहता आगीत कपडे, भांडी, साहित्यासह रोख ४५ हजार रुपये जळून खाक झाले.