रुग्णवाहिकेने २१ कि.मी.चे अंतर केले सोळा मिनिटांत पार
अर्धापूर :- इमारतीच्या दुसऱ्या मजल्यावर खेळत असणारी चिमुकली अचानक वरून खाली पडली असता गंभीर जखमी झाली. तिला कमी वेळात वेळेवर उपचारासाठी रुग्णालयांमध्ये नेल्याने चिमुकल्या मुलीचे प्राण वाचले. याकामी महामार्ग पोलिसांनी मोठा पुढाकार घेतला.
अर्धापूर शहरातील फुलेनगर येथील दयालसिंघ ठाकूर यांच्या येथे किरायाने राहत असलेल्या शिक्षिका रेणुका सुदाम नाईक यांची मुलगी अनुष्का शिवाजी सुरकुटे (वय २ वर्षे) छतावर खेळत असताना अचानक तोल गेला व खाली पडली. डोक्याला जबर मार लागल्याने ती दोन वर्षांची चिमुकली गंभीर जखमी झाली व बेशुद्ध झाली. वडील बाहेरगावी गेले होते व आई रेणुका नाईक या जि.प. हायस्कूल अर्धापूर येथील शाळेत शिकविण्यासाठी नोकरीवर गेल्या होत्या. घरी कोणीही नव्हते अशावेळी घर मालक दयालसिंघ ठाकूर यांनी त्या चिमुकलीला महामार्ग पोलीस केंद्र (वसमत फाटा) अर्धापूर, नांदेड येथे आणले. क्षणाचाही विलंब न करता महामार्ग पोलीस गजानन कदम, रमाकांत शिंदे यांनी रुग्णवाहिकेत त्या चिमुकलीला नांदेड येथील खासगी दवाखान्यामध्ये उपचारासाठी नेले. तेथील डॉक्टरांनी त्या मुलीवर उपचार केले. कमी वेळेत उपचारासाठी आणल्यामुळे त्या मुलीचे प्राण वाचले. महामार्गचे एपीआय शेख रहेमान, ज्ञानेश्वर बसवंते यांच्या मार्गदर्शनाखाली गजानन कदम, रमाकांत शिंदे, ज्ञानेश्वर तिडके, राजकुमार व्यवहारे, कमलेश जमदाडे व गणेश लोसरवार यांनी परिश्रम घेतले.
२१ कि.मी.चे अंतर सोळा मिनिटांत पार
अर्धापूर महामार्ग केंद्र पोलीस प्रशासनाने नांदेड कंट्रोल रूमला वायरलेसद्वारे संपर्क केला. यावेळी नांदेड येथील पथकाने राज कॉर्नर ते वजिराबाद रस्ता मोकळा ठेवला. रस्ता मोकळा असल्याने अर्धापूर ते यशोसीई हॉस्पिटल २१ कि.मी.चे अंतर रुग्णवाहिकेने १६ मिनिटांत पार केले. अर्धापूर येथून घेऊन निघालेल्या अ‍ॅम्ब्युलन्सला रस्ता मोकळा करून दिला.