भोकर : तालुक्यातील ग्रामपंचायत निवडणुकीच्या अनुषंगाने सदस्यपदासाठी इच्छुक ७६ जणांनी सोमवारी नामनिर्देशन पत्रे दाखल केल्यानंतर आतापर्यंत एकूण ७८ अर्ज प्राप्त झाल्याची माहिती तहसीलदार भरत सूर्यवंशी यांनी दिली.
सलग तीन दिवसांच्या सुटीनंतर सोमवारी ग्रामपंचायत सदस्यपदासाठी इच्छुकांनी तहसील परिसरात गर्दी केली होती. तालुक्यातील रिठ्ठा, बेंद्री, धावरी खु., रायखोड, पाळज, देवठाणा, नागापूर, पोमनाळा, समंदरवाडी, रेणापूर, किनी, भुरभुसी, आमठाणा, जामदरी, कामनगाव, हाडोळी आदी १६ ग्रामपंचायतींच्या सदस्यपदासाठी ७६ जणांनी नामनिर्देशन पत्रे दाखल केली आहेत, तर देवठाणा आणि धावरी खु. ग्रामपंचायतीसाठी यापूर्वी दोघांनी अर्ज दाखल केले होते. यामुळे आतापर्यंत एकूण ७८ जणांचे अर्ज दाखल झाले आहेत. विशेष म्हणजे अर्ज दाखल करताना अनेकांनी घोळक्याने येऊन शक्तिप्रदर्शन केले होते.
नामनिर्देशन पत्रे सादर करण्यासाठी तहसील कार्यालयात २२ टेबल लावण्यात आले आहेत. नामनिर्देशन पत्र दाखल करण्यापूर्वी ऑनलाइन अर्ज भरणे गरजेचे असून, त्यासाठी विविध कागदपत्रांसह जात वैधता प्रमाणपत्र, खर्चासाठी नवीन बँक बचत खाते यासह आवश्यक कागदपत्रांची पूर्तता करण्यासाठी इच्छुकांसह समर्थकांची धावपळ होत असल्याने शहरात गर्दी वाढली आहे.
तालुक्यातील ६३ ग्रामपंचायतींच्या १९३ वार्डांतून ५१३ ग्रामपंचायत सदस्यांची निवड होणार असून, आतापर्यंत फक्त ७८ जणांचेच नामनिर्देशन पत्रे दाखल झाल्यामुळे अखेरच्या दोन दिवसांत मोठी गर्दी उसळणार आहे.