काऊंटरवरून मोबाइल लांबविला
शिवाजीनगर भागात हरिओम रबडीवाला यांच्या दुकानात चार्जिंगसाठी लावलेला काऊंटरवरील साडेबारा हजार रुपये किमतीचा मोबाइल चोरट्याने लांबविला. ही घटना १० जून रोजी घडली. या प्रकरणात रूपाराम हेमाराम निवासी यांच्या तक्रारीवरून गुन्हा नोंद झाला.
खासगी रुग्णालयात चोरट्याचा डल्ला
शहरातील महेंद्रकर हॉस्पिटलमध्ये ड्युटी संपल्यानंतर स्टाफ रूममध्ये झोपलेल्या कर्मचाऱ्याचा आठ हजार रुपयांचा मोबाइल लांबविण्यात आला. ही घटना २२ जुलै रोजी घडली. या प्रकरणात विनायक बबनराव शेळके यांनी वजिराबाद ठाण्यात तक्रार दिली.
दुचाकीसाठी विवाहितेचा छळ
बिलोली तालुक्यातील मौजे मिनकी येथे दुचाकी घेण्यासाठी माहेराहून ५० हजार रुपये घेऊन येण्याच्या मागणीसाठी विवाहितेचा छळ करण्यात आला. त्यासाठी पीडितेला मारहाण करण्यात आली. या प्रकरणात बिलोली पाेलीस ठाण्यात गुन्हा नोंद झाला आहे.
पाच लाखांसाठी विवाहितेला हाकलले
अहमदनगर येथे सासर असलेल्या नांदेडच्या एका विवाहितेला सासरच्या मंडळींनी व्यापारासाठी पाच लाख रुपये घेऊन येण्याची मागणी केली होती. मागणी पूर्ण होत नसल्याने उपाशीपोटी ठेवून घराबाहेर हाकलण्यात आले.