उपाध्यक्षपदी पाटील
बिलोली -बिलोली तालुक्यातील शैलेष पाटील चिंचाळकर यांची भाजयुमोच्या जिल्हा उपाध्यक्षपदी बिनविरोध निवड झाली. यावेळी खा.प्रताप पाटील चिखलीकर, जिल्हाध्यक्ष व्यंकटराव पाटील गोजेगावकर, गंगाधरराव जोशी, लक्ष्मणराव ठक्करवाड, श्रावण पाटील, डॉ.माधव उच्चेकर, रवी पाटील आदी उपस्थित होते.
आर्थिक मदत द्या
धर्माबाद - तालुक्यातील मौजे जारीकोट येथील भोई समाजाच्या गौराबाई कन्नेवाड यांचा सर्पदंशाने मृत्यू झाला. तिच्या कुटुंबियांना गोपीनाथ मुंडे विमा योजनेचा लाभ देण्याची मागणी होत आहे.शेतात काम करत असताना गौराबाई यांना सर्पाने दंश केला होता. या संदर्भात भाजपाचे जिल्हा उपाध्यक्ष रवींद्र पोतगंठीवार यांनी संबंधितांचे लक्ष वेधले.
पणन महासंघाचे आवाहन
भोकर - पणन महासंघाच्या वतीने भोकर व हदगाव येथील कापूस खरेदी केंद्रावर कापूस खरेदी सुरू आहे. कापूस खरेदी केंद्रावर आणताना शेतकऱ्यांनी संबंधित कृषी उत्पन्न बाजार समितीमध्ये नोंदणी करून मोबाईल संदेश प्राप्त झाल्यानंतर कापूस विक्रीसाठी केंद्रावर आणावा, जोपर्यंत एफएक्यू दर्जाचा कापूस शिल्लक आहे तो कापूस पणन महासंघ खरेदी करणार आहे.
विद्युत तारा धोकादायक
हदगाव - तालुक्यातील बरडशेवाळा येथील विद्युत तारा धोकादायक बनल्या आहेत. गावातील तारा जुन्या असल्याने एकमेकांना स्पर्श होवून जाळ होण्याचे प्रकार वाढले आहेत. संबंधितांनी याकडे लक्ष देण्याची मागणी होत आहे.
गेंटलवार यांची निवड
माहूर - तालुका सीडस् पेस्टीसाईज आणि फर्टीलायझर्स संघटनेच्या तालुकाध्यक्षपदी वाईबाजार येथील अशोक गेंटलवार यांची निवड झाली. यावेळी प्रदीप गावंडे, अतुल पाटील, मधुकर बेहरे, संदीप राठोड, कुंदन राठोड, अर्जुन जाधव, जीवन अग्रवाल, सलीम खाकरा, विनायक काण्णव, श्याम पाटील, सुरज कंधारकर, रुपेश जाधव, संजय चव्हाण, प्रणीत बनगीरवार, प्रकाश येरावार आदी उपस्थित होते.
मांस विक्रीची दुकाने हलवा
निवघा बाजार - येथील रस्त्यालगत असलेले मांस विक्रीची दुकाने हटविण्यात यावी अशी मागणी विनायकराव कदम व इतरांनी केली. दुकानाला लागूनच धार्मिक स्थळ आहेत, मोठी वस्ती आहे. दुकानदाराने ग्रामपंचायतचे कोणतेही नाहरकत प्रमाणपत्र घेतले नाही.
तुरीचे पीक वाळले
मुक्रमाबाद - मुखेड तालुक्यातील मुक्रमाबाद परिसरात तुरीचे पीक वाळून गेल्याने शेतकरी हतबल झाला आहे. परिसरातील शेतकरी सोयाबीन, मूग, उडीद, ज्वारी आदी पिकात तूर घालतात. तुरीचा फायदा होतो. मात्र तुरीवरच संकट आल्याने शेतकऱ्यांना मोठा फटका बसला आहे.
नवीन शाखाधिकारी
हदगाव - जिल्हा मध्यवर्ती बँकेच्या बरडशेवाळा शाखेला नवीन शाखाधिकारी व रोखपाल मिळाले असून त्यांनी आपला पदभार स्वीकारला आहे. यापूर्वीचे शाखाधिकारी डी.आर.गायकवाड यांची सारखणी येेथे बदली झाली होती. त्यांच्या जागेवर पी.टी. पावडे यांनी पदभार स्वीकारला आहे. तर एस.जी.बाबळे हे रोखपाल म्हणून रूजू झाले आहेत.
चुरशीच्या लढतीची अपेक्षा
देगलूर - तालुक्यातील ८५ ग्रामपंचायतीसाठी ७२५सदस्य निवडले जाणार आहेत. यात ३६३महिला व ३६२पुरुषांचा समावेश आहे. मरखेल, करडखेड, खानापूर, हणेगाव, लोणी, शहापूर, तडखेल, माळेगाव या ग्रामपंचायतीच्या निवडणुकी चुरशीच्या होण्याची अपेक्षा आहे.