नांदेड : लोहा तालुक्यातील एका गावात महिलेवर अत्याचार करुन तिचे फोटो फेसबुकवर व्हायरल करणाऱ्या २३ वर्षीय आरोपीच्या विरोधात पोलिसांनी गुन्हा दाखल केला होता. लोहाचे प्रथमवर्ग न्या. प्रशांत तौर यांनी आरोपीला तीन दिवसांची पोलीस कोठडी सुनावली. १० जानेवारी रोजी ही घटना घडली होती.
पीडितेच्या घरातील मंडळी शेतात गेली असताना महिला घरी एकटीच होती. ही संधी साधून दिनेश निवृत्ती पवार हा आरोपी तिच्या घरात आला. यावेळी चाकूचा धाक दाखवून त्याने महिलेवर अत्याचार केला. झालेला प्रकार कुणाला सांगितल्यास जीवे मारण्याची धमकी दिली. त्यानंतर महिलेसोबत काही फोटो काढले. २४ मार्च रोजी आरोपीने महिलेसोबतचे काही फोटो फेसबुकवर टाकले. घटनेची माहिती पीडितेने पतीला दिली. त्यानंतर या प्रकरणात पोलिसांनी गुन्हा नोंदविला होता. या प्रकरणाचा तपास पोउपनि गित्ते हे करीत आहेत. पोलिसांनी तात्काळ दिनेश पवार या आराेपीला अटक केली. न्यायालयाने त्याला तीन दिवसांची कोठडी सुनावली. सरकार पक्षाच्या वतीने ॲड. गिरीष मोरे यांनी बाजू मांडली.