नागपूर : महापालिकेची आर्थिक स्थिती बिकट आहे. त्यात आपली बस १०० कोटींच्या तोट्यात आहे. याचा विचार करता मनपाची आपली बससेवा महामेट्रोला हस्तांतरित करण्याच्या प्रस्तावाला गुरुवारी परिवहन समितीच्या बैठकीत मंजुरी देण्यात आली.
शहरातील परिवहन सेवा एकाच प्राधिकरणाकडे असावी. तसेच यातून बचत होणाऱ्या १०० कोटींतून शहरातील विकासकामे करता येईल, अशी माहिती परिवहन सभापती बाल्या बोरकर यांनी पत्रकार परिषदेत दिली. परिवहन सेवा महामेट्रोच्या माध्यमातून चालविण्याचा प्रस्ताव मनपा प्रशासनाने आणला आहे. मात्र अद्याप महामेट्रो यांच्याकडून बस चालविण्याचा प्रस्ताव आलेला नाही. मनपाने स्वत: हा प्रस्ताव तयार आणला आहे.
नियम व अटीच्या आधीन राहून बससेवा महामेट्रोला देण्याच्या प्रस्तावाला समितीत मंजुरी देण्यात आली.
मनपाचा बससेवेवर वर्षाला १६४.८३ कोटींचा खर्च, तर उत्पन्न ६४.४६ कोटी आहे. म्हणजेच १०० कोटींचा तोटा आहे. त्यात केंद्र सरकारकडून मिळणाऱ्या ४० इलेक्ट्रिक बसमुळे मनपावर पुन्हा २० कोटींचा बोजा वाढणार आहे. ४२६ रेडबसचे संचालन मनपा करीत आहे. तीन रेड बस ऑपरेटर व एक इलेक्ट्रिक बस ऑपरेटरच्या माध्यमातून बसचे संचालन होत आहे. महामेट्रोने मनपाला बुटीबोटी ते सीताबर्डी व हिंगणा ते सीताबर्डी दरम्यानची बससेवा बंद करण्याचा सल्ला दिला होता. वास्तविक मनपा फिडर बससेवा उपलब्ध करण्याला तयार आहे.
या मार्गावरील बससेवा बंद केल्यास आपल्या बसला मोठा तोटा सहन करावा लागणार आहे. परिवहन समितीच्या मंजुरीनंतर हा प्रस्ताव सर्वसाधारण सभेत ठेवला जाईल. त्यानंतर राज्य सरकार व केंद्र सरकारची मंजुरी मिळाली तरच बससेवा हस्तांतरित करणे शक्य होईल.
सत्तापक्षातील पदाधिकाऱ्यांनी दिलेल्या माहितीनुसार महामेट्रो स्वत:ला सक्षम करण्यात अपयशी ठरली आहे. मेट्रो सेवेचे खासगीकरण केले जात आहे. अशा परिस्थितीत आपली बस महामेट्रोला हस्तांतरित केल्यास नागरिकांना मिळत असलेली बससेवाही मिळणार नाही. विशेष म्हणजे वर्ष २०१७ मध्ये बस ऑपरेटची नियुक्ती करताना दहा वर्षांसाठी बससेवा संचालित करण्याचे अधिकार देण्यात आले आहे. आयबीटीएम ऑपरेटर डिप्टसची तीन वर्षांसांठी नियुक्ती करण्यात आली. अशा परिस्थितीत सेवा हस्तांतरित करावयाची झाल्यास यासाठी अनेक अडचणींचा सामना करावा लागणार आहे.