घणाचे घाव घालून पत्नी, मुलगा, सुनेची हत्या

कौटुंबिक वादातून संतापलेल्या वृद्धाने सोमवारी पहाटे ५.३0 वाजता घणाचे घाव घालून वृद्ध पत्नी, मुलगा व सुनेला ठार केले. या निर्घृण हत्याकांडाने गावासह परिसरात एकच खळबळ माजली आहे.

आरोपी पित्यास अटक : गावात तणावपूर्ण शांतता

गोरेगाव (जि. गोंदिया) : कौटुंबिक वादातून संतापलेल्या वृद्धाने सोमवारी पहाटे ५.३0 वाजता घणाचे घाव घालून वृद्ध पत्नी, मुलगा व सुनेला ठार केले. या निर्घृण हत्याकांडाने गावासह परिसरात एकच खळबळ माजली आहे. रक्ताच्या थारोळ्यात सोडून आरोपी पित्याने पळ काढला होता. हत्याकांडातील मृतांची नावे बिरनबाई पांडुरंग अगडे (५७), छन्नालाल पांडुरंग अगडे (३७) व योगेश्‍वरी छन्नालाल अगडे (३२, रा. गोरेगाव) अशी आहेत.

आरोपी पांडुरंग अगडे (६२) याला शेतात आलेले गहू विकायचे होते. त्यास पत्नी बिरनबाई व मुलगा छन्नालाल यांचा विरोध होता. त्यावरून चार-पाच दिवसांपूर्वी त्यांच्यात भांडण झाले होते. त्या भांडणाचा राग पांडुरंग मनात धरून होता. त्यातून त्याने सर्वजण झोपेत असताना सोमवारी पहाटे प्रथम मुलगा छन्नालालवर घणाचे घाव घालून करून जखमी केले. मुलाच्या ओरडण्याने बिरनबाई उठली. तिने सून योगेश्‍वरीच्या मदतीने पांडुरंगला विरोध केला असता रागाने बेभान झालेल्या पांडुरंगने त्यांच्यावरही घणाचे घाव घालून हल्ला चढविला. तो एवढय़ावरच न थांबता त्याने रक्ताच्या थारोळ्यात पडलेल्या पत्नी व सुनेच्या अंगावर रॉकेल ओतून जाळण्याचा प्रयत्नही केला.

माय-लेकांच्या ओरडण्याचा आवाज ऐकून शेजारी धावले असता पांडुरंग घराबाहेर पळाला. घडलेल्या प्रकाराबाबत शेजार्‍यांनी पोलिसांना माहिती दिली. लगेच पोलीस घटनास्थळी दाखल झाले असता त्यांना घरात तिघे जखमी अवस्थेत आढळून आले. घरातील दृष्य भयावह होते. गावकर्‍यांनी जखमींना उपचाराकरिता गोंदिया येथे हलविण्याचा प्रयत्न केला.

मात्र, रस्त्यातच बिरनबाईंचा मृत्यू झाला. सून योगेश्‍वरीने उपचारापूर्वीच रूग्णालयात अखेरचा श्‍वास घेतला. मुलगा छन्नालालची प्रकृती अधिक गंभीर असल्याने नागपूरला पाठविण्यात आले. मात्र नागपूरला जाताना त्यानेही वाटेतच प्राण त्यागला.

या तिहेरी हत्याकांडाची माहिती वार्‍यासारखी परिसरात पसरली. पांडुरंगविरोधात गावकरी चिडले. गावातले वातावरण भडकू नये, म्हणून पोलिसांनी अतिरिक्त कुमक बोलावून परिस्थिती नियंत्रणात आणली. आरोपी पळून जात असताना पोलिसांनी त्याला मोठय़ा शिताफीने अटक केली. घटनेनंतर गावात तणावपूर्ण शांतता असून पोलिसांनी आरोपीविरोधात भादंवि कलम ३0२ अंतर्गत गुन्हा दाखल केला आहे. या प्रकरणाचा तपास ठाणेदार रवीन्द्र शिंदे करीत आहेत. (तालुका प्रतिनिधी)