नागपूर : अखिल भारतीय पुलक मंच परिवारासोबतच अनेक भक्तांनी मंगळवारी भारत गौरव राष्ट्रसंत शांतिदूत पुलकसागरजी गुरुदेव यांच्या ५१व्या अवतरण दिनानिमित्त घरोघरी पूजनाचे आयोजन केले. यावेळी विधान, अष्टक, जयमाला, आरती, चालिसा, णमोकार महामंत्राच्या पाठाचेदेखील आयोजन करण्यात आले होते. सकाळपासूनच अनेक भक्तांनी घरासमोर रांगोळ्या काढल्या होत्या. काही कुटुंबांनी गीत, संगीताच्या माध्यमातून आचार्यश्री पुलकसागरजी गुरुदेव यांना शुभेच्छा दिल्या. आचार्यश्री पुलकसागरजी गुरुदेव श्री दिगंबर जैन जिनशरणं तीर्थधाम उपलाट, पालघर येथे विराजमान आहेत. गुरुदेवांच्या निर्देशामुळे नागपुरात होणारे सर्व कार्यक्रम रद्द करण्यात आले आहेत, असे पुलक मंच परिवाराचे राष्ट्रीय कार्याध्यक्षद्वय मनोज बंड व डॉ. रिचा जैन यांनी सांगितले.
गुरुदेव कृपाळू व दयाळू आहेत : दर्डा
सकल जैन समाजाचे राष्ट्रीय अध्यक्ष, ‘लोकमत’ वृत्तपत्र समूहाच्या एडिटोरिअल बोर्डचे चेअरमन व माजी खासदार विजय दर्डा यांनी आचार्यश्री पुलकसागरजी गुरुदेव यांना शुभेच्छा संदेश पाठविला. गुरुदेव आपण कृपाळू व दयाळू आहात. आपला वात्सल्यभाव आमच्यासारख्या भक्तांवर राहतो. २००५ साली नागपुरात आपला चतुर्मास झाला होता. चिटणीस पार्क स्टेडियममध्ये ४५ दिवसीय प्रवचनमालेचे आयोजन झाले होते. प्रवचनानंतर लगेच प्रश्नमंच व्हायचा व त्याचे प्रायोजक होण्याचा बहुमान लोकमत समूहाला मिळाला होता. आचार्यश्री आम्ही दररोज ‘लोकमत’च्या माध्यमातून लाखो वाचकांपर्यंत तुमचा संदेश पोहोचविला होता. विस्कटलेल्यांना एका सूत्रात आणणे व बांधणे हा आपला मंत्र त्यावेळी सकल जैन समाजाला मिळाला होता. आमच्या सर्वांची प्रार्थना, अनेक आचार्य भगवंतांच्या मंत्रसाधनेतून व स्वत:च्या तपस्येतून गुरुदेवांनी कोरोनावर विजय मिळविला आहे. नागपुरातील चतुर्मास अभूतपूर्व झाला होता व मला इतवारीत आचार्यश्रींचे दर्शन व आशीर्वादाचा लाभ झाला होता. मी अनेक विषयांवर आपल्याशी चर्चा केली व आपले मार्गदर्शनदेखील मिळाले. गुरुदेव म्हणतात की, पुस्तकं तुमची स्वत:ची मित्र असतात. गुरुंची गोष्ट सत्य आहे. आपल्या मार्गदर्शन, प्रेरणा व निर्देशनात बनलेल्या पुलक मंच परिवाराच्या शाखा देशभरात सक्रिय आहेत. तुमचे विचार, प्रकल्प समाजसेवेच्या माध्यमातून सर्व पुलकभक्त जनतेपर्यंत पोहोचवित आहेत. मागील वर्षी कोरोनाकाळात नागपुरातच नाही तर मंचच्या सदस्यांनी देशभरात मदत पोहोचविली. मी आचार्य भगवंतांना अवतरण दिवसाच्या शुभेच्छा देतो. आचार्यश्री तुम्ही स्वस्थ राहा, दीर्घायू व्हा. आपला रत्नत्रय नेहमी मंगल होवो. कोरोनाची महामारी संपल्यानंतर नागपुरात आपला भव्य चतुर्मास व्हावा, अशी मी नागपूर आणि विदर्भातील आपल्या सर्व भक्तांतर्फे आपल्या चरणी प्रार्थना करतो. आम्हा सर्वांना आपले मार्गदर्शन व आशीर्वाद मिळावे. आपण नागपुरात यावे असे माझे आग्रहपूर्वक निवेदन आहे. आम्ही सगळे सकल जैन समाजाच्या झेंड्याअंतर्गत आपल्या आगमनाची प्रतीक्षा करू. परत एकदा गुरुदेव आपल्याला अवतरण दिवसाच्या शुभेच्छा. हे वर्ष आपल्यासाठी मंगलमय व्हावे, अशी भावना दर्डा यांनी व्यक्त केली.
शुभेच्छा संदेशातून गुरुंचे गुणगान
आचार्यश्री पुलकसागरजी गुरुदेव यांच्या अवतरण दिवसानिमित्त देशभरातील भक्त, विविध संस्थांच्या पदाधिकाऱ्यांनी शुभेच्छा देऊन गुरुंचे गुणगान केले. आरएमडी फाऊंडेशनच्या उपाध्यक्ष शोभाताई रसिकलाल धारिवाल, अखिल भारतीय पुलक मंच परिवाराचे राष्ट्रीय अध्यक्ष विनोद फांदोत, मीना झांझरी, राष्ट्रीय महामंत्री प्रदीप जैन, बीना टोंग्या, सुमन गंगवाल, सोहनलाल कलावत, सीमा गंगवाल, अंकित जैन प्रिंस, सुनील काला, संतोष जैन पेंढारी, नरेश पाटनी, मनीष मेहता, मनोज बंड, डॉ. रिचा जैन, पंकज बोहरा, अतुल कोटेचा, पूनम बिनायका, दिलीप शिवणकर, नितीन नखाते, नीरज जैन, लोकेश पाटोदी, सतीश जैन पेंढारी, राजेंद्र नखाते, डॉ. रवींद्र भुसारी, कमल बज, पारस रांवका, ऋषभ आगरकर इत्यादींनी शुभेच्छा दिल्या.