लोकमत न्यूज नेटवर्क
नागपूर - मंगळवारी सकाळी छत्रपती चाैकाजवळच्या फूटपाथवर एका अनोळखी महिलेचा मृतदेह संशयास्पद अवस्थेत आढळल्याने उलटसुलट चर्चेला उधाण आले होते. शवविच्छेदन तपासणीनंतर महिलेचा मृत्यू शारीरिक व्याधीमुळे झाल्याचे डॉक्टरांकडून स्पष्ट करण्यात आले.
मंगळवारी सकाळी ९ च्या सुमारास वर्धा मार्गावरील छत्रपती चाैकाजवळच्या प्रिन्स कॉम्प्लेक्सजवळ डिव्हायडरवर एका अनोळखी महिलेचा मृतदेह (वय अंदाजे ४० ते ४५) आढळला. तिचे कपडे अस्तव्यस्त होते. त्यामुळे उलटसुलट चर्चा सुरू झाली. माहिती कळताच प्रतापनगरचे ठाणेदार दिनकर ठोसरे आपल्या सहकाऱ्यांसह घटनास्थळी धावले. त्यांनी आजूबाजूला विचारणा केली असता सदर महिला तीन चार महिन्यांपासून या भागात भीक मागत असल्याचे उघड झाले. तिच्यासोबत आणखी एक भिकारी राहत होता, असेही पोलिसांना कळले. तत्पूर्वी ती काशीनगर अजनीत राहत होती, हे माहीत झाल्यानंतर पोलिसांनी तिच्या नातेवाईकांबाबत चाैकशी केली. तिचा मुलगा अमरावतीला राहत असल्याचे पोलिसांना समजले. पोलिसांनी त्याच्याशी संपर्क केला. दरम्यान, महिलेचे विस्कटलेले कपडे आणि तिच्या सोबत राहणारा भिकारी बेपत्ता असल्याने पोलिसांनी त्याचाही शोध सुरू केला. रात्री डॉक्टरांनी दिलेल्या अहवालात महिलेचे फुफ्फुस खराब झाले होते, त्यामुळे तिचा मृत्यू झाल्याचा अंदाज व्यक्त केला. त्यामुळे शंकाकुशंकांना विराम मिळाला. एएसआय वसंत शेडमाके यांनी रवींद्र जनार्दन गाऊत्रे (वय ३२) यांची तक्रार नोंदवून अकस्मात मृत्यूची नोंद केली. पुढील तपास सुरू आहे.
----
महिलेने जाळून घेतले
नागपूर - हमीदनगर, यशोधरानगरात राहणाऱ्या यासिन बानो जाकिर शेख (वय २२) यांनी सोमवारी दुपारी १२ च्या सुमारास जाळून घेतले. मिळालेल्या माहितीवरून यशोधरानगर पोलिसांनी अकस्मात मृत्यूची नोंद केली. पुढील तपास सुरू आहे.
----