नागपूर : जुन्या वादातून गुंड प्रवृत्तीच्या तरुणाने एका तरुणाला फेकून मारलेला चाकू एका महिलेला लागला. त्यामुळे ती गंभीर जखमी झाली. प्रतापनगरात सोमवारी सायंकाळी ४.४५ वाजता ही घटना घडली.त्रिमूर्ती नगरातील चिंतामणी अपार्टमेंटमध्ये राहाणारा स्वप्नील रवींद्र इंगळे (वय ३५) याच्यासोबत नीलू ऊर्फ नीलेश राजेश नायडू (वय २८) आणि मनोज गोदनलाल राऊत (वय ३५, रा. दोघेही प्रतापनगर) या दोघांचा जुना वाद आहे. सोमवारी सायंकाळी ४.४५ वाजता स्वप्नील आदर्श कॉलनीतून जात होता. नीलेश आणि मनोजने त्याला अश्लील शिवीगाळ केली. आरोपी मनोजने त्याला दुरूनच चाकू फेकून मारला. जीवाचा धोका लक्षात घेत स्वप्नील तेथून पळून गेला. मात्र, आरोपींनी फेकलेला चाकू रस्त्याने जाणाऱ्या कमलाबाई निमजे यांच्या पोटाला लागला. त्यामुळे त्या गंभीर जखमी झाल्या. या घटनेमुळे परिसरात संतापजनक वातावरण निर्माण झाले. निमजे यांना मेडिकलमध्ये दाखल केल्यानंतर स्वप्नीलने प्रतापनगर पोलिसांना कळविले. पोलिसांनी आरोपी नीलेश आणि मनोजविरुद्ध प्राणघातक हल्ल्याच्या आरोपाखाली गुन्हा दाखल करून दोन्ही आरोपींना अटक केली. (प्रतिनिधी)
गुंडांनी फेकलेला चाकू महिलेला लागला
By admin | Updated: August 13, 2015 03:36 IST