नागपूर : लकडगंज पोलिसांच्या मदतीने पुण्याच्या एका सामाजिक संस्थेच्या पदाधिकाऱ्यांनी गंगाजमुनात छापा घालून दोन अल्पवयीन मुलींची सुटका केली. त्यांच्याकडून जबरदस्तीने वेश्याव्यवसाय करवून घेणाऱ्या एका महिलेलाही गजाआड करण्यात आले. मंजू सोरसिंग धनावत (वय ३८) असे आरोपी महिलेचे नाव आहे. ती मूळची आगरा जिल्ह्यातील पिपरेटा (ता. खेडागर) येथील रहिवासी असून, सध्या गंगाजमुना वस्तीत दीपक केसियाच्या इमारतीत राहाते. ती अल्पवयीन मुलींकडून वेश्याव्यवसाय करवून घेत असल्याची माहिती पुण्याच्या ‘फ्रीडम फर्म‘ या सामाजिक संस्थेच्या कार्यकर्त्यांना कळली. त्यांनी गुरुवारी दुपारी शहानिशा केल्यानंतर लकडगंज ठाण्यात तक्रार केली. नंतर पोलिसांच्या मदतीने मंजूच्या अड्ड्यावर धाड घालण्यात आली. येथून यावेळी अनेक तरुणी आणि ग्राहकांनी पळ काढला. मात्र, पोलिसांनी दोन अल्पवयीन मुलींसह मंजू धनावतला ताब्यात घेतले. मंजू या मुलींकडून जबरदस्तीने वेश्याव्यवसाय करवून घेत असल्याचे स्पष्ट झाल्यामुळे तिच्याविरुद्ध पोलिसांनी गुन्हे दाखल करून तिला अटक केली. (प्रतिनिधी)
देहव्यवसाय करवून घेणारी महिला गजाआड
By admin | Updated: September 13, 2014 02:44 IST