नागपूर : मोबाइल हरविलेल्या एका प्रवाशाचा मोबाइल काही मिनिटांतच शोधून त्यास परत केल्याची घटना नागपूर रेल्वेस्थानकावर मंगळवारी सकाळी ११ वाजता घडली.
विशाल कुमार विश्वकर्मा (२८), रा. विश्वनाथपुरम, बरेली, उत्तर प्रदेश हा प्रवासी रेल्वे सुरक्षा दलाच्या ठाण्यात आला. त्याने सांगितले की, तो रेल्वेगाडी क्रमांक ०२८४९ ने नागपूरला आल्यानंतर सकाळी ११ वाजता त्याचा २५ हजार रुपये किमतीचा मोबाइल हरवला. त्यानंतर ड्यूटीवर तैनात आरपीएफ जवान नवीन कुमार, अजय कुमार यांना त्याची सूचना देण्यात आली. त्यानंतर सीसीटीव्ही फुटेजची तपासणी केली असता प्लॅटफार्म क्रमांक २ वर फूड स्टॉलजवळ मोबाइल पडून असल्याचे दिसले. लगेच हा मोबाइल ताब्यात घेण्यात आला. कागदोपत्री कारवाई करून हा मोबाइल संबंधित प्रवाशाला देण्यात आला. अवघ्या काही मिनिटांतच आरपीएफने मोबाइलचा छडा लावल्याबद्दल संबंधित प्रवाशाने आरपीएफचे आभार मानले आणि आपल्या रेल्वेमंत्र्यांना ट्विटरवरून आरपीएफच्या तत्परतेबद्दल धन्यवाद दिले.
...........