न.प.चा कौल कुणाला?

जिल्ह्यातील नरखेड, काटोल, कळमेश्वर, मोहपा, सावनेर, खापा, कामठी, रामटेक आणि उमरेड नगर परिषदेच्या

नागपूर : जिल्ह्यातील नरखेड, काटोल, कळमेश्वर, मोहपा, सावनेर, खापा, कामठी, रामटेक आणि उमरेड नगर परिषदेच्या नगराध्यक्ष आणि नगरसेवक पदांसाठी रविवारी (दि. ८) सकाळी ७.३० ते सायंकाळी ५.३० वाजताच्या दरम्यान मतदान घेण्यात आले. या सर्व ठिकाणी एकूण ३३१ विविध मतदान केंद्रांवर सरासरी ७३.०३ टक्के मतदारांनी मतदानाचा हक्क बजावला. परिणामी, नगराध्यक्षपदाच्या नऊ जागांसाठी एकूण ७० आणि नगरसेवकपदाच्या १८५ जागांसाठी एकूण ८६४ उमेदवारांचे राजकीय भाग्य मशीनबंद करण्यात आले. मतदान प्रक्रियेदरम्यान काटोल वगळता कुठेही अनुचित प्रकार घडला नाही. नरखेड येथे एकूण २५ मतदान केंद्रांवर १७,५११ मतदारांपैकी ७१.६४ टक्के मतदारांनी मतदानाचा हक्क बजावला. येथे नगराध्यक्ष पदासाठी नऊ तर नगरसेवकांच्या १७ जागांसाठी ७५ उमेदवार रिंगणात आहेत. काटोल येथे ७०.७४ टक्के मतदान झाले. येथे एकूण ३१,८२४ मतदार असून, ४४ मतदान केंद्रांंवर मतदान घेण्यात आले. येथे नगराध्यक्ष पदासाठी ९ आणि नगरसेवकांच्या २३ जगांसाठी ११५ उमेदवार भाग्य आजमावत आहेत. कळमेश्वर येथे २४ मतदान केंद्रांवर १६,५९० मतदारांपैकी ७५.६९ टक्के मतदारांनी मतदान केले. येथे नगरसेवकांच्या १७ जागांसाठी ६७ तर नगराध्यक्ष पदासाठी आठ उमेदवार रिंगणात आहेत. मोहपा येथे एकूण ५,६६७ मतदारांपैकी ८५.९६ टक्के मतदारांनी मतदानाचा हक्क बजावला. येथे नऊ मतदान केंद्रांवर मतदान घेण्यात आले असून, नगराध्यक्ष पदासाठी सात तर नगरसेवकांच्या १७ जागांसाठी ६८ उमेदवारांनी आपले भाग्य आजमावले. सावनेर येथे एकूण ३४ मतदान केंद्रांवर २४,८८६ मतदारांपैकी ७३.५२ टक्के मतदारांनी मतदान केले. येथे नगराध्यक्ष पदासाठी पाच तर नगरसेवकांच्या २० जागांसाठी एकूण ७५ उमेदवारांनी त्यांचे आव्हान कायम ठेवले होते. खापा येथे नगराध्यक्ष पदासाठी पाच तर नगरसेवकांच्या १७ जागांसाठी एकूण ६१ उमेदवार रिंगणात होते. येथे १७ मतदान केंद्रांवर मतदान घेण्यात आले असून, एकूण ११,८९२ मतदारांपैकी ७४.५२ टक्के मतदारांनी मतदानाचा हक्क बजावला. कामठी येथे एकूण १०२ मतदान केंद्रांवर ७८,९६० मतदारांपैकी ६०.१७ टक्के मतदारांनी मतदान केले. येथे नगराध्यक्ष पदासाठी एकूण १२ आणि नगरसेवकांच्या ३२ जागांसाठी १८९ उमेदवार रिंगणात आहेत. रामटेक येथे एकूण १८,५१९ मतदारांपैकी ७०.२० टक्के मतदारांनी शहरातील २६ मतदान केंद्रांवर मतदान केले. येथे नगराध्यक्ष पदासाठी सात आणि नगरसेवकांच्या १७ जागांसाठी एकूण ८१ उमेदवार रिंगणात होते. उमरेड येथे ५० मतदान केंद्रांवर एकूण ५९,७८४ मतदारांपैकी ७४.८७ टक्के मतदारांनी मतदान केले. येथे नगराध्यक्ष पदासाठी एकूण आठ तर नगरसेवकांच्या २५ जागांसाठी १३३ उमेदवारांनी आपापले राजकीय भाग्य आजमावले. (जिल्हा प्रतिनिधी) १०.३० वाजतानंतर मिळेल पहिला कल जिल्ह्यातील नऊ ठिकाणी सोमवारी (दि. ९) सकाळी १० वाजतापासून मतमोजणी प्रक्रियेला सुरुवात केली जाणार आहे. मतमोजणी ही स्थानिक ठिकाणी केली जाईल. यासाठी संबंधित ठिकाणी आठ ते १४ टेबल्स तयार करण्यात आले असून, ही मतमोजणी दोन फेऱ्यांमध्ये केली जाईल. मतमोजणीच्या ठिकाणी अनूचित प्रकार घडू नये, यासाठी चोख पोलीस बंदोबस्त ठेवण्यात आला आहे. असे झाले मतदान (%) नरखेड - ७१.६४ काटोल - ७०.७४ कळमेश्वर - ७५.६९ मोहपा - ८५.९६ सावनेर - ७३.५६ खापा - ७४.५२ कामठी - ६०.१७ रामटेक - ७०.२० उमरेड - ७४.८७ गोंदिया जिल्ह्यात गोंदिया न.प.साठी ६२.७२ तर तिरोड्यात ७०.१५ टक्के मतदान झाले .