कुजबुज : तुमानेंचे फडणवीस प्रेम

- गेली विधानसभा निवडणूूक भाजप- शिवसेना युती करून लढली याचा विसर महाविकास आघाडीची सत्ता स्थापन करताना मुख्यमंत्री उद्धव ठाकरे यांना पडला असला तरी रामटेकचे शिवसेनेचे खासदार कृपाल तुमाने यांनी मात्र त्याचे चांगलेच स्मरण ठेवले आहे. दोन दिवसापूर्वी विरोधी पक्षनेते देवेंद्र फडणवीस यांचा वाढदिवस झाला. फडणवीसांवर राज्यभरांतून शुभेच्छांचा वर्षाव झाला. पण शिवसेनेच्या कुण्या नेत्याने फडणवीस यांना जाहीरपणे शुभेच्छा दिल्याचे दिसले नाही. खा. कृपाल तुमाने यांनी मात्र आपल्या फेसबुकवर फडणवीस यांना शुभेच्छा देणारे बॅनर पोस्ट केले. मग काय तुमानेंच्या पोस्टवर एकाने ‌‘फडणवीस जनतेच्या मनातील मुख्यमंत्री’ अशी कॉमेंट केली. तुमानेंची पोस्ट पाहणाऱ्या प्रत्येकाला आश्चर्य वाटले. आधीच दिवस चांगले नाहीत, अशात एवढं उघड प्रेम कशासाठी, अशी कुजबुज तुमानेंच्या कार्यकर्त्यांमध्ये सुरू झाली.