नागपूर : राज्यात सत्ताबदल झाल्यानंतर भाजप-शिवसेना (उद्धव ठाकरे गट) यांच्या सदस्यांमध्ये वारंवार आरोप-प्रत्यारोपाचा क्रम सुरू आहे. मात्र, दोन्ही पक्षांतील मतभेद मनभेदामध्ये परिवर्तित झाले असताना भाजपचे प्रदेशाध्यक्ष चंद्रशेखर बावनकुळे यांनी विधान परिषदेत मोठे वक्तव्य केले आहे. सेना-भाजप युती तुटावी, अशी आमची इच्छाच नव्हती. जर दोन्ही पक्ष सोबत असते तर अनेक वर्षे सत्तेत राहिलो असतो, असे प्रतिपादन बावनकुळे यांनी केले.
अंतिम आठवडा प्रस्तावादरम्यान ते बोलत होते. युतीमध्ये निवडणुका लढविताना आम्ही शिवसेनेचे उमेदवार निवडून यावेत यासाठी तासनतास बसून चर्चा करीत राहायचो आणि शिवसेनेचे नेते निघून जायचे. देवेंद्र फडणवीसांचा चेहरा वापरून त्यांनी निवडणुका लढविल्या आणि काँग्रेस, राष्ट्रवादीसोबत सत्ता स्थापन केली. जेव्हा जेव्हा समाजात बेईमानी होते, तेव्हा निसर्गच बदला घेत असतो, शिंदे-फडणवीसांचे सरकार हे निसर्गिक सरकार आहे. यानंतर बावनकुळे म्हणाले, सहा महिन्यांत काय झाले, असे प्रश्न विचारले जातात. शेतकऱ्यांशी निगडित सर्वाधिक सकारात्मक निर्णय हे आमच्याच सरकारने घेतले.
महाविकास आघाडीच्या काळात पालकमंत्री आणि मुख्यमंत्री आढावा बैठकाच घेत नव्हते. शेतकऱ्यांना विमा कंपन्यांकडून मिळत असलेली तोकडी मदत हे महाविकास आघाडी सरकारचेच पाप आहे, असा आरोप त्यांनी केला.
ते फेसबुक लाइव्हच करत राहिले
कोकणासाठी निर्णय घ्यायची वेळ होती तेव्हा महाविकास आघाडी सरकारने निर्णय घेतले नाहीत. कोकण उद्ध्वस्त होत असताना माजी मुख्यमंत्री केवळ फेसबुक लाइव्ह करीत राहिले व १८ महिने मंत्रालयात आले नाहीत, आता शिंदे-फडणवीस १८-१८ तास काम करीत आहेत, असा चिमटा बावनकुळे यांनी काढला.
बारामतीत एकदाच गेलाे, पवारांना इतके काय लागले ?
अजितदादांनी तुमचा करेक्ट कार्यक्रम करण्याचा इशारा दिलाय, असा उल्लेख राष्ट्रवादीचे सदस्य शशिकांत शिंदे यांनी त्यांच्या भाषणात केला. यावर मी भाजपचा प्रदेशाध्यक्ष आहे तर बारामतीच्या दौऱ्यात मी राष्ट्रवादीचा उमेदवार निवडून येणार असे बोलू का? माझी भूमिका आमच्या पक्षाच्या उमेदवारासाठीच असेल हे स्पष्ट आहे. मी एकदाच बारामतीत गेलो आणि पवारांना त्याचे नेमके इतके काय लागले, असा सवाल त्यांनी उपस्थित केला.