राजू नारायण सुपटकर (३५, रा. श्रीकृष्णनगर, झिंगाबाई टाकळी) हे पत्नी हर्षा सुपटकर (२६) यांच्यासोबत पॅशन गाडी (क्रमांक एमएच ३१ बीआर ७५१८) ने जात होते. कपिलनगर पोलीस ठाण्याच्या हद्दीत सिग्नल रेड झाल्यामुळे ते थांबले. त्यावेळी आरोपी ट्रकचालक रामभगत रामखिलावन पांडे (२६, रा. कुडियापवई, पोस्ट सिंध्दी, ता. रामपूर, मध्य प्रदेश) याने आपल्या ताब्यातील आयसर ट्रक (क्रमांक एमएच ४० वाय ०२५८) निष्काळजीपणे चालवून राजूच्या दुचाकीला धक्का दिला. त्यामुळे राजू आणि त्यांची पत्नी खाली पडले. त्यानंतर आरोपी ट्रकचालकाने ट्रक समोर घेतला असता राजू ट्रकच्या चाकाखाली आल्यामुळे ते गंभीर जखमी झाले. त्यांना उपचारासाठी मेयो रुग्णालयात नेले असता डॉक्टरांनी तपासून मृत घोषित केले.
दुसऱ्या घटनेत सक्करदरा पोलीस ठाण्याच्या हद्दीत शुक्रवारी सायंकाळी ७.४५ वाजता लाल रंगाची कार (क्रमांक एमएच ४९ बीके ४५९७) च्या आरोपी चालकाने कार निष्काळजीपणे चालवून बॉलिवूड सेंटर पॉइंट चौकातील दुकानासमोर उभ्या असलेल्या ५५ वर्षाच्या अनोळखी व्यक्तीस धडक देऊन गंभीर जखमी केले. त्यांना उपचारासाठी मेडिकलमध्ये भरती केले असता उपचारादरम्यान शनिवारी मध्यरात्री २.३० वाजता त्यांचा मृत्यू झाला. सक्करदरा पोलिसांनी आरोपी कारचालकाविरुद्ध गुन्हा दाखल केला आहे.
..................