ऑनलाइन लोकमत
नागपूर, दि. 20 - पिशवी चोरल्याच्या संशयावरून दोन जणांनी एकाला दगडाने ठेचून त्याची हत्या करण्याचा धक्कादायक प्रकार समोर आला आहे. या घटनेत बंशी राऊत (वय50) हे गंभीर जखमी झाले आहेत. राऊत हे 14 मार्चच्या रात्री 9.30 वाजता खापरीतील मिहान पुलाखाली झोपून होते. आरोपी अनिल आणि भोकण्या उर्फ रमेश काल्या त्यांच्याजवळ आले. राऊत यांच्यावर त्यांनी कपड्याची पिशवी चोरल्याचा आरोप लावला. यावरुन तिघांमध्ये वाद झाला. आरोपी अनिल आणि भोकण्याने बाजूचा दगड उचलून राऊत यांच्या डोक्यावर, तोंडावर, मानेवर ठेचणे सुरू केले.
गंभीर जखमी झालेल्या राऊत यांनी आरडाओरड केल्यामुळे आजूबाजूची मंडळी धावून आली. त्यानंतर आरोपी पळून गेले. रुग्णालयात उपचार करून घेतल्यानंतर राऊत यांनी सोनेगाव ठाण्यात तक्रार नोंदवली. पोलिसांनी गुन्हा दाखल केला. आरोपी अनिल आणि भोकण्या हे दोघेही कचरा वेचून विकतात. त्यांच्या प्रमाणे अनेक जण मिहानच्या पुलाखाली राहतात. तेथेच दारू, गांजा पिणा-यांचीही गर्दी जमते. बाजूला वाहनचालकांच्या छोट्या मोठ्या वस्तू चोरून त्या भागातील आरोपी कबाड्यांकडे विकतात. नशा केल्यानंतर त्यांच्यात हाणामा-या, वादविवाद होणे, हे नित्याचेच प्रकार आहे.