ट्रकची धडक, वृद्ध ठार

उमरेड : तालुक्यातील मकरधोकडा शिवारात अज्ञात ट्रक चालकाने निष्काळजीपणाने ट्रक चालविल्याने दुचाकीस जोरदार धडक लागली. यामध्ये दुचाकीवर मागे बसलेले वृद्धाचा घटनास्थळीच मृत्यू झाला. केशव मनीराम वाढवे (७०, रा. देवळी) असे मृताचे नाव असून, दुचाकी चालक पुंडलिक फकीरा सैयद (४६, रा. देवळी) हा जखमी झाला आहे. गुरुवारी सायंकाळी ६ वाजताच्या सुमारास सदर अपघात झाला. एम.एच.४०- सी- २८८० या क्रमांकाच्या दुचाकीने पुंडलिक सैयद हा केशव वाढवे यांच्यासोबत मकरधोकडा येथून देवळी या गावाच्या दिशेने जात होते. त्यांच्या अगदी मागे एम.एच.४०-यू- ३१९५ या क्रमांकाच्या दुचाकीने प्रवीण रायभान कुळमेथे (३५, मुरादपूर) हा तरुणही मुरादपूर येथे जात होता. अशातच समोरून येणाऱ्या ट्रकची जोरदार धडक लागली. यामध्ये केशव वाढवे जागीच ठार झाले, तर पुंडलिक सैयद आणि प्रवीण कुळमेथे जखमी झाले. ट्रक चालक वाहनासह पसार झाला. उमरेड पोलीस ठाण्यात २७९, ३३७, ३३८, ३०४ (अ), (ब), १८४/१७७ मोक्का अन्वये सदर गुन्हा दाखल झाला आहे. पुढील तपास पोलीस निरीक्षक यशवंत सोलसे करीत आहेत.