नागपूर : घरी कोणालाच न सांगता जयपूरला पळून जाणाऱ्या अल्पवयीन प्रेमी युगुलास रेल्वे सुरक्षा दलाने शनिवारी सायंकाळी ५ वाजता पकडले. त्यांच्या आईवडिलांना सूचना देऊन त्यांना रेल्वे चाईल्ड लाईनच्या स्वाधीन करण्यात आले आहे.
विशाल (१७) आणि सुनिता (१५) (बदललेली नावे) हे दोघेही छत्तीसगडमधील भिलाई येथे राहतात. विशाल पॉलिटेक्निकला शिकत असून सुनिता नवव्या वर्गात शिकते. दोघेही एकाच गल्लीत राहत असल्यामुळे त्यांचे आपसात सूत जुळले. आईवडिलांचा आपल्या प्रेमाला विरोध होईल असा विचार करुन दोघांनीही घर सोडायचे ठरवले. ते रेल्वेगाडीने नागपूरला आले. सायंकाळी ५ वाजता ते प्लॅटफार्म क्रमांक एकवरील जनरल वेटिंग हॉलजवळ संशयास्पद स्थितीत बसून होते. आरपीएफ जवानाच्या त्यांच्याकडे लक्ष गेल्यानंतर त्याने या दोघांची विचारपुस केली. त्यावेळी दोघांनीही उडवाउडवीची उत्तरे दिली. परंतु अधिक चौकशी केल्यानंतर त्यांनी घरून पळून आलो असून जयपूरला जाणार होतो, अशी माहिती दिली. लगेच रेल्वे चाईल्ड लाईनच्या प्रतिनिधींना बोलाविण्यात आले. त्यानंतर त्यांच्या आईवडिलांना ते सापडल्याची माहिती देऊन त्यांना रेल्वे चाईल्ड लाईनच्या स्वाधीन करण्यात आले. वेळीच ते आरपीएफला आढळल्यामुळे मोठा अनर्थ टळला. ते असामाजिक तत्वांच्या हाती लागले असते तर त्यांचे आयुष्य उद्ध्वस्त झाले असते.
.............