गुन्हेगार होतात फरार : प्रत्येक गाडी तपासण्याची नाही यंत्रणानागपूर : रेल्वे मार्गाने अलीकडच्या काळात गांजा आणि दारूची तस्करी वाढली असून मागील काही महिन्यात अनेकदा मिळालेल्या गुप्त माहितीनुसार लोहमार्ग पोलिसांनी गांजा आणि दारू ताब्यात घेतली. परंतु लोहमार्ग पोलीस सतर्क असले तरीसुद्धा प्रत्येक रेल्वेगाडी तपासण्याएवढे मनुष्यबळ त्यांच्याकडे उपलब्ध नसल्यामुळे गुन्हेगारांचे चांगलेच फावत असून उघडकीस न येता अनेकदा दारू आणि गांजाची तस्करी झाली असण्याची शक्यता आहे.मागील काही महिन्यांपासून रेल्वे मार्गाने दारू आणि गांजाची तस्करी वाढल्याचे उघडकीस आले आहे. अनेकदा लोहमार्ग पोलिसांना गुप्त माहिती मिळाल्यानंतर ते संबंधित रेल्वेगाडीची कसून तपासणी करून गांजा, दारू ताब्यात घेतात. अनेकदा हा मुद्देमाल शौचालयाजवळ ठेवून आरोपी तेथे हजर राहत नाहीत. पोलीस आल्याचे कळताच तेथून ते निघून जातात. पोलिसांच्या अनेक कारवाईत गांजा, दारू हाती लागली. परंतु गुन्हेगारच हाती लागले नसल्यामुळे पुन्हा ते आपल्या कामासाठी सज्ज होत असल्याची स्थिती आहे. लोहमार्ग पोलिसांकडे हवे तेवढे मनुष्यबळ नसल्यामुळे त्यांना नागपूर रेल्वेस्थानकावर येणाऱ्या प्रत्येक रेल्वेगाडीची कसून तपासणी करणे शक्य होत नाही. नेमक्या याच बाबीचा फायदा घेऊन गुन्हेगार रेल्वेमार्गाने गांजा, दारूची तस्करी करीत आहेत. लोहमार्ग पोलिसांना माहिती मिळाली तरच ते संबंधित गाडीची तपासणी करतात. परंतु अनेकदा पोलिसांपर्यंत तस्करी होत असल्याची माहितीच येत नाही. अशा प्रसंगी गुन्हेगार सहजरीत्या दारू, गांजाच्या मुद्देमालाची तस्करी करण्यात यशस्वी होत असल्याची स्थिती आहे. (प्रतिनिधी)
रेल्वेत तस्करी वाढली!
By admin | Updated: July 3, 2014 00:51 IST