लोकमत न्यूज नेटवर्क
नागपूर : नागपूर महापालिकेच्या उपद्रव शोध पथकाच्या जवानांनी सोमवारी मास्कशिवाय फिरणाऱ्या बेजबाबदार १२३ नागरिकांविरुद्ध कारवाई केली. त्यांच्याकडून ६१ हजार ५०० रुपयांचा दंड वसूल केला. या सर्व नागरिकांना मास्क देण्यात आले. मागील काही दिवसात शोध पथकांनी २२,९०० नागरिकांविरुद्ध कारवाई करून ९८ लाख ९ हजारांचा दंड वसूल केला आहे.
कोरोना रुग्णांची संख्या कमी झालेली असली तरी कोरोना विषाणूच्या संसर्गाचा अद्याप धोका टळला नाही. असे असूनही अनेक जण विनामास्क फिरतात. ही बाब घातक आहे. त्यामुळे उपद्रव शोध पथकाद्वारे त्यांच्यावर कारवाई केली जात आहे. तसेच त्यांना मास्क देण्यात येत आहेत.
लक्ष्मीनगर झोनअंतर्गत १३, धरमपेठ १८, हनुमाननगर २२, धंतोली ११, नेहरूनगर ११, गांधीबाग ९, सतरंजीपुरा १०, लकडगंज ७, आशीनगर १४ आणि मंगळवारी ८ जणांविरुद्ध कारवाई करण्यात आली. शोध पथकाचे प्रमुख वीरसेन तांबे यांच्या मार्गदर्शनात ही कारवाई केली जात आहे. नागरिकांनी मास्क लावून आपली व आपल्या कुटुंबाची सुरक्षा करावी, असेही आवाहन मनपातर्फे करण्यात आले आहे.