लोकमत न्यूज नेटवर्क
नागपूर : शहरालगतच्या भागातील नागरिकांना तीन वर्षापूर्वी टँकरची प्रतीक्षा करावी लागत होती. ३५० ते ४०० टँकर सुरू होते. परंतु आता ही परिस्थिती राहिलेली नाही. अशा २ लाख २३ हजार नागरिकांना सुरळीत पाणीपुरवठा सुरू झाला आहे. १२० टँकर बंद करण्यात आले. दिवसाआड पाणी पुरवठा होणाऱ्या २ लाख १३ हजार नागरिकांना दररोज पाणी मिळत आहे. कमी दाबाने पाणीपुवठा होणाऱ्या १३२ वस्त्यांतील समस्या मार्गी लागली. ४० हजार घरांना नवीन जोडण्या दिल्या. ११ जलकुंभाची कामे करण्यात आली. पाणीपुरवठ्यात वाढ करून शहरातील पाणीपुरवठा सुरळीत करण्याचा प्रयत्न केला असा लेखाजोखा माहिती मावळते जलप्रदाय समितीचे सभापती विजय झलके यांनी गुरुवारी पत्रकार परिषदेत मांडला.
शहरात सर्व भागात पाणी पुरवठा सुरळीतरीत्या व्हावा याकरिता पाण्याच्या टाक्यांची संख्या वाढविण्याकडे भर दिला. काही भागात नागरिकांकडूनही टाकीला विरोध होत असल्याचे निदर्शनास आले. यावर उपाय म्हणून ‘डबल डेकर’ पाण्याची टाकी तयार करण्याची संकल्पना पुढे आणली. मेट्रोच्या उड्डाण पुलाच्या धर्तीवर एकाच ठिकाणी दोन पाण्याच्या टाक्या निर्मितीची संकल्पना पूर्णत्वास आणण्याचा प्रयत्न केला. नागपुरातील प्रभाग ३४ मधील चक्रपाणी नगर भागात ही टाकी तयार होत आहे. तसेच हुडकेश्वर-नसराळा क्षेत्रातील तीन नवीन टाक्या उभारल्याची माहिती त्यांनी यावेळी दिली. पदाधिकारी व अधिकाºयांनी यासाठी सहकार्य केल्याचे त्यांनी सांगितले.
....
तीन वर्षात झालेला बदल
- २४ बाय ७ योजनेद्वारे १० कमांड एरिया वाढवून २३ केल्या
- पाणी पुरवठा ६६५ एमएलडी वरून ६५७ एलएलडी
- उपभोक्तांची संख्या ३ लाख ३६ हजार ६८६ वरून ३ लाख ७५ हजार ७५८
- पाईपलाईन, ५९७.२६ किमी वरून ६८७.५० किमी
- गृह नळजोडणी, १ लाख ६८ हजार ९५३ वरून २ लाख ४६ हजार ७०६
- २९ टक्के पाणी बिल डिजिटल पेमेंटद्वारे जमा
- अवैध नळजोडणी कापण्यासाठी झोनमध्ये पथक गठीत
- २५ कॉमन एरिया मध्ये २४ बाय ७ योजना लागू, ६ लाख ७ हजार ९४ लोकांना लाभ
- दूषित पाणी पुरवठ्याची १२८ भागतील समस्या मार्गी.
- १५० किमी पाईप लाईनचे जाळे
- २८ उद्यानांमध्ये रेन वाटर हार्वेस्टिंग सिस्टीम लागू
- वाॅटर ऑडिटची सुरूवात झाली.
- ५ लिकेजेस दुरूस्त, ७ एमएलडी पाणी बचत
- ५०२ विहिरींची स्वच्छता,नवीन ४०९ बोअरवेल
-टंचाई परिस्थितीत २८९ विहीरींमधून पाणी पुरवठा
- अमृत योजनेंतर्गत ३७७ किमी पाईप लाईन पैकी २६० किमी पूर्ण
- ११ पाण्याच्या टाक्यांचे बांधकाम सुरू
- १७० लेआऊटला पाणी पुरवठा सुरू