५० टक्के सिंचन झाल्याशिवाय आत्महत्या थांबणार नाहीत

विदर्भात शेतजमिनीच्या सिंचनाची टक्केवारी वाढविण्याची आवश्यकता आहे. जोपर्यंत ५० टक्के सिंचन क्षमतेचा विकास होत नाही,

नितीन गडकरी : विदर्भात दूध उत्पादन वाढविणारलोकमत न्यूज नेटवर्कनागपूर : विदर्भात शेतजमिनीच्या सिंचनाची टक्केवारी वाढविण्याची आवश्यकता आहे. जोपर्यंत ५० टक्के सिंचन क्षमतेचा विकास होत नाही, तोपर्यंत शेतकऱ्यांच्या आत्महत्या थांबणार नाहीत, असे प्रतिपादन केंद्रीय भूपृष्ठ वाहतूक व जहाजबांधणी मंत्री नितीन गडकरी यांनी केले. केंद्र शासनाला तीन वर्षांचा कार्यकाळ पूर्ण झाल्यानिमित्त त्यांनी रविवारी त्यांच्या निवासस्थानी पत्रकारांशी संवाद साधला. राज्य शासनाने जलसंवर्धनासाठी मोठे पाऊल उचलले आहे व यामुळे भूजल पातळीदेखील वाढत आहे. मात्र सिंचन क्षमता आणखी वाढविण्याची आवश्यकता आहे. कर्जमाफीमुळे शेतकरी आत्महत्या थांबणार नाहीत. शेतकऱ्यांना जोडधंदा सुरू करण्यासाठी प्रोत्साहन देण्याची आवश्यकता आहे. हीच बाब लक्षात घेता विदर्भात विविध योजना आणण्यात येत आहे. विदर्भात दूध उत्पादन वाढावे व यातून शेतकऱ्यांचा फायदा व्हावा यासाठी विशेष प्रकल्प सुरू होणार आहे. याची जबाबदारी ‘एनडीडीबी’ला (नॅशनल डेअरी डेव्हलपमेंट बोर्ड) देण्यात आली असून, २५ लाख लिटर दूध उत्पादनाचे उद्दिष्ट डोळ्यासमोर ठेवण्यात आले आहे. या योजनेत विदर्भातील सात तर मराठवाड्यातील चार जिल्ह्यांचा समावेश करण्यात आला आहे. यामुळे विदर्भातील तीन ते पाच लाख शेतकऱ्यांना लाभ होईल, असे गडकरी यांनी सांगितले. नागपूर मनपाने ‘एनडीडीबी’ला शहरातील ४० ठिकाणांवर दूध विकण्याची परवानगी दिली आहे. ४ जून रोजी नागपुरात या योजनेचा शुभारंभ होईल, अशी माहिती गडकरी यांनी दिली.गडचिरोलीत अगरबत्ती तयार करण्याचे काम सुरू झाले असून, यामुळे पाच हजार लोकांना रोजगार मिळाला आहे. तसेच गडचिरोली व वर्धा येथून मध गोळा करून त्याची आयात करण्यात येणार आहे. मत्स्यव्यवसायाला वाढविण्यासाठी योजना तयार करण्यात आली आहे. यामुळे शेतकऱ्यांना जोडधंदा सहज उपलब्ध होईल, असा विश्वास गडकरी यांनी व्यक्त केला. यावेळी गडकरी यांनी गेल्या तीन वर्षांत मिहान व नागपुरात आलेल्या गुंतवणुकीविषयी तसेच विकास कामांविषयी माहिती दिली. आ. सुधाकर देशमुख, आ. अनिल सोले, आ. मल्लिकार्जुन रेड्डी प्रामुख्याने उपस्थित होते.