सावनेर : लॉकडाऊन शिथिल केल्यानंतर प्रशासनाने बसची वाहतूक सुरू केली आहे. वाहतुकीची प्रभावी व पुरेशी साधने नसल्याने गरीब नागरिकांची गैरसोय होत असल्याने नागपूर- छिंदवाडा (मध्य प्रदेश) मार्गावरील रेल्वे वाहतूक पूर्ववत सुरू करावी, अशी मागणी प्रवाशांनी केली आहे.
मध्य प्रदेशातील सीमावर्ती भागात राहणारे शेकडो कामगार नागपूर जिल्ह्यात रोजगारासाठी येतात. शिवाय, या भागातील व्यापारी व शेतकरी खरेदी-विक्रीसाठी मध्य प्रदेशात जातात. नागपूर-छिंदवाडा मार्गावरील रेल्वे सध्या बंद असल्याने त्यांना वाहतुकीस अडचणी येत आहेत. ही रेल्वे बंद असल्याने भाजीपाला व फळे तसेच दूध व दुग्धजन्य पदार्थ विक्रेत्यांची गैरसाेय होत आहे. शिवाय, या मार्गावरील रेल्वेस्थानक परिसरात फळे, नाश्ता, चहा व इतर वस्तूंची विक्री करून उदरनिर्वाह करणारे आर्थिक संकटात सापडले आहेत. त्यामुळे ही समस्या सोडविण्यासाठी या मार्गावरील रेल्वे तातडीने सुरू करण्याची मागणी ग्रामीण भागातील प्रवाशांनी केली आहे.