स्टार बसवर दगडफेक

हिंगणा-नागपूर मार्गावरील राजीवनगर व परिसरातील शेकडो विद्यार्थी रोज शाळा - महाविद्यालयात स्टार बसने ये-जा करतात.

हिंगणा : हिंगणा-नागपूर मार्गावरील राजीवनगर व परिसरातील शेकडो विद्यार्थी रोज शाळा - महाविद्यालयात स्टार बसने ये-जा करतात. दरम्यान, शनिवारी सकाळी राजीवनगर येथे स्टार बस उशिरा आल्याने संतप्त विद्यार्थ्यांनी बसवर दगडफेक केली. सुदैवाने यात कुणालाही दुखापत झाली नाही. त्यात स्टार बसच्या मागच्या काचा फुटल्या. ही घटना शनिवारी सकाळी ७.४५ वाजताच्या सुमारास घडली. हिंगणा, रायपूर, वानाडोंगरी, राजीवनगर यासह परिसरातील शेकडो विद्यार्थी रोज स्टार बसने नागपूरला शाळा-महाविद्यालयात जातात. यातील बहुतांश विद्यार्थी पासधारक आहेत. हिंगण्याहून नागपूरला जाणारी स्टार बस रोज सकाळी ६.३० वाजताच्या सुमारास राजीवनगर थांब्यावर येते. नेहमीप्रमाणे राजीवनगर बसथांब्यावर विद्यार्थी बसची प्रतीक्षा करीत उभे होते. एमएच-३१/सीए-६१४२ क्रमांकाची स्टार बस शनिवारी सकाळी ७.४५ वाजताच्या सुमारास राजीवनगरात पोहोचली. विद्यार्थी बसची प्रतीक्षा करीत उभे असताना चालकाने बस या थांब्यावर न थांबविता थेट नागपूरला निघून जाण्याचा प्रयत्न केला. त्यामुळे संतप्त विद्यार्थ्यांनी मागून बसच्या दिशेने दगडफेक केली. त्यात या बसच्या मागच्या काचा फुटल्या. परिणामी, चालक नीतेश शामराव माने याने सदर बस थोडी थांबविली आणि थेट एमआयडीसी पोलीस ठाण्यात नेली. या घटनेनंतर अर्ध्या तासात एकापाठोपाठ एक अशा एकूण पाच स्टार बस नागपूरच्या दिशेने निघून गेल्या. परंतु, एकही बस राजीवनगर बसथांब्यावर थांबविण्यात आली नाही. त्यामुळे विद्यार्थ्यांना ताटकळत राहावे लागले. राजीवनगरातील बसथांब्यावर नेहमीच बस थांबविली जात नाही, असा आरोप अनेक विद्यार्थ्यांनी केला. त्यामुळे शाळेत जाण्यास विलंब होत असल्याचे त्यांनी सांगितले. याप्रकरणी एमआयडीसी पोलिसांनी गुन्हा नोंदवून तपास सुरू केला आहे. (तालुका प्रतिनिधी)