स्टार बस चालकाची गुंडगिरी

अनियंत्रित व भरधाव वेगाने गाडी चालवण्याबाबत जाब विचारल्याच्या कारणावरून एका स्टार बस चालकाने शहरातील प्रसिद्ध सामाजिक कार्यकर्त्या छाया खोब्रागडे यांना अश्लील शिवीगाळ करून

विधानसभा चौकातील घटना : सामाजिक कार्यकर्त्या छाया खोब्रागडे यांना मारहाण नागपूर : अनियंत्रित व भरधाव वेगाने गाडी चालवण्याबाबत जाब विचारल्याच्या कारणावरून एका स्टार बस चालकाने शहरातील प्रसिद्ध सामाजिक कार्यकर्त्या छाया खोब्रागडे यांना अश्लील शिवीगाळ करून भर चौकात मारहाण केल्याचा संतापजनक प्रकार विधानसभा चौकात मंगळवारी घडला. या घटनेवरून स्टार बस चालकांची गुंडगिरी किती वाढली आहे, हे स्पष्ट झाले आहे. छाया खोब्रागडे या मंगळवारी दुपारी ४ वाजताच्या सुमारास धर्मादाय आयुक्त कार्यालयातून आपले काम आटोपून माया उके यांच्यासह आपल्या स्कुटीने (एमच-३१ बीव्ही ५३३३) संविधान चौकाकडे जात होत्या. दरम्यान आकाशवाणी चौकात एमएच ३१-सीए-५२०३ क्रमांकाची स्टार बस ही भरधाव वेगाने त्यांच्या गाडीला अगदी लागून निघून गेली. अचानक घडलेल्या या घटनेने त्या घाबरून गेल्या. थोडाही स्पर्श झाला असता तरी त्यांना अपघात झाला असता. पुढे विधानभवन चौकात सिग्नलवर स्टार बस थांबताच छाया खोब्रागडे यांनी एका जागरूक नागरिकाप्रमाणे चालकाला इतक्या भरधाव वेगाने गाडी चालवण्याबाबत जाब विचारला. यावर आपल्या कृत्याची माफी मागण्याऐवजी स्टार बस चालक हुसैन अली (३९) रा. मोहपा हा खाली उतरला आणि छायाताई खोब्रागडे यांच्या अंगावर धावून गेला. त्यांना अश्लील शिवीगाळ केली. त्यांचे केस पकडून त्यांना खाली पाडले आणि मारहाण केली. छायाताई यांच्यासोबत असलेल्या माया उके यांनी मध्यस्ती केली असता त्यांनाही मारहाण केली. या मारहाणीत छाया खोब्रागडे यांच्या चेहऱ्याला व हाताला मार बसला. इतकेच नव्हे तर पोलिसात तक्रार दाखल करण्याची धमकी दिली असता, ‘पोलीस माझे काय बिघडवणार म्हणत तू कशाला मीच पोलिसांना बोलावतो’, अशी गुर्मीही दाखविली. भरदुपारी ही घटना घडली. यावेळी पाहणाऱ्यांची एकच गर्दी झाली होती. या संतापजनक घटनेनंतर स्वत:ला सावरून छाया खोब्रागडे यांनी काही कार्यकर्त्यांना फोन करून घटनेची माहिती दिली आणि लगेच सदर पोलीस ठाण्यात तक्रार दाखल करायला गेल्या, अ‍ॅड. संजय खोब्रागडे, राजेश वालदे, अ‍ॅड. विजय बागडे, प्रवीण उके, राजू कापसे, विशाल हुमने, मिलिंद फुलझेले, राहुल दहिकर, अ‍ॅड नितनवरे, विजया बागडे, दीपांकर भगत, वंदना पेठकर आदी पोलीस ठाण्यात पोहोचले. (प्रतिनिधी)पोलिसांची भूमिकाही संशयास्पद तक्रारकर्त्या एक सामाजिक कार्यकर्त्या होत्या. सोबत चार वकील व इतर कार्यकर्तेही होते. असे असतानाही पोलिसांनी त्यांना तब्बल ७ वाजेपर्यंत बसवून ठेवले. त्यानंतर त्यांच्या हाताला मार लागला असतानाही त्यांना तक्रार लिहायला सांगितली. मारहाण झाली असल्याची तक्रार केली असतानाही वैद्यकीय तपासणी करण्यास सांगितले नाही. तक्रारकर्त्यांनी मागणी केली, परंतु त्यांच्यासोबत एकही पोलीस पाठविला नाही. त्यामुळे त्यांना वैद्यकीय तपासणी करताना मेडिकलमध्ये खूप त्रास झाला. या सर्व प्रक्रिया पार पाडताना रात्रीचे ११.३० त्यांना पोलीस ठाण्यातच वाजले तरी पोलिसांनी केवळ तक्रार नोंदवून घेतली गुन्हा दाखल केला नाही. छाया खोब्रागडे व काही कार्यकर्ते बुधवारी पुन्हा पोलीस ठाण्यावर धडकले. त्यांनी आरोपीविरुद्ध गुन्हा दाखल करण्याची मागणी लावून धरली तेव्हा कुठे आरोपी चालाकाविरुद्ध कलम ३५४, ३२३़, ५०४ भादंवि अन्वये गुन्हा दाखल करण्यात आला. एकूणच या प्रकरणात पोलिसांची भूमिका ही आरोपीला वाचवणारी होती.