लोकमत न्यूज नेटवर्क
नागपूर : कोविड संक्रमणाचा धोका लक्षात घेता महापालिका मुख्यालयात बाहेरील लोकांच्या प्रवेशावर बंदी घातली आहे. परंतु त्यानंतरही मनपा मुख्यालयात कामाशिवाय फिरणारे दिसतात. पदाधिकाऱ्यांशिवाय नगररचना विभागात लोकांची गर्दी दिसायला लागली आहे. सामान्य दिवशी मुख्यालयात बाहेरील लोकांची वर्दळ अधिक असते. लॉकडाऊननंतर गर्दी काही प्रमाणात कमी झाली.
मुख्यालय परिसरात बँक, एटीएम आहे. यामुळे बाहेरील नागरिक येतात. परंतु मनपा आयुक्त राधाकृष्णन बी. यांनी कामाशिवाय परिसरात नागरिक येत असल्याचा इन्कार केला. मनपा मुख्यालयात मोठ्या संख्येने कर्मचारी व अधिकारी पॉझिटिव्ह येत आहेत. काहींचा मृत्यू झाला आहे. यामुळे विभाग प्रमुखासह मनपा अधिकारी व कर्मचाऱ्यांत भीतीचे वातावरण आहे. यामुळे कामानिमित्त येणाऱ्या बाहेरील व्यक्तीशी बोलायला कुणी तयार नाही.
...
महापौर कक्षातील कर्मचाऱ्याचा मृत्यू
महापौर कक्षात कार्यरत असलेले लोखंडे यांचा मृत्यू झाल्याची माहिती मिळाली. महापौर दयाशंकर तिवारी पॉझिटिव्ह आल्यानंतर कक्षातील कर्मचाऱ्यांची कोरोना चाचणी करण्यात आली. यात तीने ते चार कर्मचारी पॉझिटिव्ह आले होते. मनपाच्या आरोग्य विभागाने दिलेल्या माहितीनुसार चपराशी लोखंडे याला मेडिकल रुग्णालयात दाखल करण्यात आले होते. उपचारादरम्यान त्याचा मंगळवारी मृत्यू झाला. यापूर्वी वित्त विभागातील एका चपराशाचा मृत्यू झाला होता. लक्ष्मीनगर झोनमधील जेई, विद्युत विभागातील कर्मचारी याचा दुसऱ्या लाटेत मृत्यू झाला.
..
पदाधिकाऱ्यांच्या कक्षात शुकशुकाट
कोरोना संक्रमणाच्या धास्तीमुळे मागील काही दिवसात पदाधिकाऱ्यांच्या कक्षात शुकशुकाट दिसत आहे. पदाधिकारीही मनपात येण्याचे टाळत आहेत. यामुळे कार्यकर्त्यांची वर्दळ कमी झाली आहे. कक्षाबाहेर चपराशी दिसत नसल्याने शुकशुकाट दिसत आहे.