नागपूर : सलून आणि स्पाच्या नावाखाली चालणाऱ्या देहव्यापाराच्या अड्ड्यावर पोलिसांनी धाड टाकली. गोकुळपेठेत ही कारवाई झाली. चार दिवसांत अशा प्रकारची ही दुसरी कारवाी आहे.
रोहित उर्फ बंटी विजय खेडकर (३३, रा. पाचीबोडी) असे अटक आरोपीचे नाव आहे. बंटीचे धरमपेठेत फॅमिली सलून आहे. याच्या नावाखाली तो वेश्याव्यवसाय करायचा. तो सलूनच्या केबिनमध्ये स्पा चालवत असे. तेथे स्पासाठी येणाऱ्या लोकांना तो इतर सेवा घेण्याचे आमिष दाखवत असे. याची माहिती मिळताच झोन-२ चे उपायुक्त राहुल मदने यांनी त्यांच्या पथकाला कारवाई करण्याच्या सूचना दिल्या. पोलिसांनी डमी ग्राहक सलूनमध्ये पाठवला. त्याने मुलीसाठी बंटीसोबत सौदा केला. डमी ग्राहकाकडून पैसे घेताच पोलिसांनी बंटीला पकडले.
पोलिसांनी पीडित २५ वर्षीय तरुणीची सुटका केली. पीडित मुलगी गरीब कुटुंबातील आहे.ती घर चालवण्यासाठी हे काम करते. कामाच्या शोधात असताना ती बंटीच्या जाळ्यात पडली आणि वेश्याव्यवसायात अडकली. हे सलून गोकुळपेठ मार्केटपासून जवळ आहे. असे असतानाही तेथे वेश्याव्यवसाय सुरू असल्याने आश्चर्य व्यक्त होत आहे. १६ जानेवारी रोजी प्रतापनगर येथील वेश्याव्यवसायाच्या अड्ड्यावर छापा टाकून चार महिलांची सुटका करण्यात आली होती.