भिवापूर : काही कामानिमित्त चिमूर येथे गेलेल्या भिवापूर येथील तरुणांच्या स्कॉर्पिओला परतीच्या प्रवासात अपघात झाल्याने यात चालक ठार तर त्याचे तीन सहकारी मित्र गंभीर जखमी झाले. सदर अपघात भिवापूर लगतच्या भुयार परिसरात मंगळवारी रात्री ११ वाजताच्या सुमारास झाला. मोहित उमराव गिरी (२१) रा. भिवापूर असे मृताचे नाव आहे. तर सुनील विठ्ठल मैदिले (४५) रा. भिवापूर, अमर गुलाब कांबळी (२३), आदेश सिद्धार्थ गायकवाड (२९) दोन्ही रा. तास, अशी जखमींची नावे आहेत.
प्राप्त माहितीनुसार मृत व जखमींसह त्यांचे शहरातीलच अन्य तीन मित्र असे एकूण सात जण मंगळवारी दुपारच्या सुमारास स्कॉर्पिओ क्र. एम.एच. २३ ई. ९६४१ या वाहनाने चिमूर येथे गेले होते. रात्री परत येत असताना भुयार मार्गावरील सेव्हन हिल्स रेस्टॉरंटजवळ चालक मोहितचे भरधाव स्कॉर्पिओवरील नियंत्रण सुटले आणि अपघात झाला. स्कॉर्पिओ तब्बल दोनवेळा पलटी झाल्याने चालक मोहितच्या डोक्याला गंभीर दुखापत झाली होती. दरम्यान त्याचा घटनास्थळीच मृत्यू झाला. यात तीन सहकारी गंभीर जखमी झाले असून, अन्य तीन सहकारी सुखरूप आहेत. अपघातस्थळ भंडारा जिल्ह्यातील पवनी पोलिसांच्या हद्दीत येत असले तरी भिवापूरपासून अगदी जवळ आहे. त्यामुळे माहिती मिळताच स्थानिकांनी धाव घेत मृत व जखमींना भिवापूर येथील ग्रामीण रुग्णालयात हलविले. प्राथमिक उपचारानंतर तिन्ही गंभीर जखमींना नागपूर येथे हलविण्यात आले. यावेळी रुग्णालयात आप्तस्वकीयांनी मोठी गर्दी केली होती. बुधवारी सकाळी ग्रामीण रुग्णालयात शवविच्छेदन करून मृतदेह कुटुंबीयांच्या सुपूर्द करण्यात आला. याप्रकरणी भिवापूर पोलिसांनी मृत्यूची नोंद केली असून, पुढील तपास पवनी पोलिसांच्या सुपूर्द करण्यात आला आहे.