नागपूर : रेल्वे सुरक्षा दलाने जीटी आणि एपी एक्स्प्रेसमध्ये ५.७० लाख रुपये किमतीचा ५७ किलो गांजा पकडून दोन आरोपींना अटक केली आहे.
आरपीएफने गांजा तस्करांविरुद्ध मोहीम सुरू केली आहे. त्यानुसार वरिष्ठ विभागीय सुरक्षा आयुक्त आशुतोष पांडे यांच्या मार्गदर्शनाखाली निरीक्षक आर. एल. मिना, एन. एल. यादव, व्ही. के. पटेल, आय. पी. चौकसे, उमेश यादव, हरविंदर मंगलदीप, मनोज घायगुडे यांनी दोन रेल्वेगाड्यांत गांजा तस्करांविरुद्ध कारवाई केली. मिळालेल्या माहितीनुसार रेल्वेगाडी क्रमांक ०२६१५ चेन्नई-नवी दिल्ली जीटी एक्स्प्रेस सकाळी ११.३० वाजता प्लॅटफॉर्म क्रमांक एकवर पोहोचली. ड्यूटीवर तैनात असलेला आरपीएफ जवान राजेश रमेश गडपलवार आणि धीरज रामकिशन दहिया हे तपास करत सेकंड क्लास एसी कोच ए १ मध्ये पोहोचले. तेथे बर्थ क्रमांक ३९ वरून प्रवास करीत असलेल्या रानकीरेड्डी सुब्बा वेरीकास्वामी (२८), रा. बालारवी, जिल्हा राजमुंद्री, आंध्र प्रदेश याच्या जवळ २ ट्रॉली बॅग संशयास्पद स्थितीत आढळल्या. त्याने रामगुंडमवरून भोपाळला जात असल्याचे सांगितले. बॅगमधील सामानाबाबत विचारणा केली असता तो घाबरला. बॅग उघडून पाहिली असता त्यात २४ पाकिटांमध्ये ४७.८४९ किलो गांजा आढळला. तसेच रेल्वेगाडी क्रमांक ०२८०५ विशाखापट्टनम-दिल्ली एपी एक्स्प्रेसमध्ये आरपीएफच्या गुप्तचर विभागाने १० किलो गांजा पकडून एका आरोपीला अटक केली. आरपीएफचा जवान भास्करने सूचना पाठविली की, या गाडीत कोच ई २ मध्ये बर्थ क्रमांक ३ आणि ४ खाली गांजा असण्याची शक्यता आहे. नागपूर रेल्वेस्थानकावरून सीआयबीचे साहनी आणि करवदे गाडीत चढले. त्यांनी बर्थ क्रमांक ३ आणि ४ खाली तपासणी केली असता एका मोठ्या चादरमध्ये काही ठेवलेले होते. तेथे आरोपी खेतावत कृष्णा मंगलता नायक (३२), रा. मैय्या भांडा, पो. रेगुलाबट्टा, जिल्हा नालगोडा बसला होता. त्याने गांजा तस्करी करीत असल्याची कबुली दिल्यामुळे त्यास अटक करण्यात आली.
.........